പ്രകൃതിയിലലിഞ്ഞ് ദിവ്യകാരുണ്യ തിരുനാള്‍

കൊച്ചി: ബോള്‍ഗാട്ടി സ​െൻറ് സെബാസ്റ്റ്യന്‍ ദേവാലയത്തില്‍ ഭക്തിസാന്ദ്രമായ അന്തരീക്ഷത്തില്‍ ദിവ്യകാരുണ്യ തിരുനാള്‍ ആഘോഷിച്ചു. 220 അടി നീളത്തിലെ ഹരിത വര്‍ണ പന്തലായിരുന്നു ഈ വര്‍ഷത്തെ തിരുനാളി​െൻറ പ്രത്യേകത. ചീനവേലിയും, വാഴക്കുലകളും കരിക്കിന്‍കുലകളും ചക്കയും കൈതച്ചക്കയും പന്തലിനിരുവശവും വെച്ച് നിർമിച്ച ഈ പന്തല്‍ ഭൂതകാല ഓര്‍മകളുടെ സാക്ഷാത്കാരമായിരുന്നു. കുരുത്തോലകളും പച്ചയോലകളും കൊണ്ടുള്ള തോരണങ്ങള്‍ പന്തലിന് മോടികൂട്ടി. കൂടാതെ കുരുത്തോലകള്‍കൊണ്ട് വ്യത്യസ്ത വസ്തുക്കളും നിര്‍മിച്ച് പന്തലില്‍ ചാര്‍ത്തി. പന്തലി​െൻറ കവാടം മെടഞ്ഞെടുത്ത പച്ചയോലയും ചരടുംകൊണ്ടാണ് നിര്‍മിച്ചത്. പ്ലാസ്റ്റിക് പൂർണമായും ഒഴിവാക്കി എല്ലാ അർഥത്തിലും പ്രകൃതി സൗഹാര്‍ദമായാണ് പന്തലൊരുക്കിയത്. വിശ്വാസികള്‍ സൗജന്യമായി നല്‍കിയ വസ്തുക്കള്‍കൊണ്ട് അവര്‍ തന്നെ നിർമിച്ച പന്തല്‍ വേറിട്ട കാഴ്ചയായി. രാവിലെ റവ. ഫാ. റോബിന്‍ അറക്കലി​െൻറ മുഖ്യകാര്‍മികത്വത്തില്‍ ദിവ്യബലിയും തുടര്‍ന്ന് ദിവ്യകാരുണ്യപ്രദക്ഷിണവും നടത്തി. ഇടവക വികാരി ഫാ. ജയന്‍ പയ്യപ്പിള്ളി, ഫാ. സ്റ്റീഫന്‍ മേത്തശ്ശേരി, ഫാ. അഗസ്റ്റിന്‍, ഡോമിനിക് നടുവത്തേഴത്ത്, തദേവൂസ് മാളിയേക്കല്‍, അബിജിത്ത് ജോണ്‍, സന്തോഷ് കുരിശിങ്കല്‍ എന്നിവര്‍ തിരുനാളിന് നേതൃത്വം നല്‍കി.