കനത്ത മഴയില്‍ റോഡില്‍ അപകടക്കെണിയായി കുഴി

കാക്കനാട്: മഴയെത്തുടര്‍ന്ന് വാഹന തിരക്കേറിയ റോഡില്‍ രൂപപ്പെട്ടത് വലിയ കുഴി. കരിമക്കാട്-എന്‍.പി.ഒ.എല്‍. റോഡിലാണ് വാഹന യാത്രക്കാര്‍ക്ക് അപകടക്കെണിയായി കുഴിയുണ്ടായത്. കരിമക്കാട്-എന്‍.പി.ഒ.എല്‍. റോഡിലെ നാലു റോഡുകള്‍ ചേരുന്ന ജങ്ഷനിലാണ് യാത്രക്കാര്‍ക്ക് അപകട ഭീഷണി. രണ്ടു മാസം മുമ്പ് ചെറിയതോതില്‍ ഇടിഞ്ഞ ഭാഗം മഴ ആരംഭിച്ചതോടെ വലിയ കുഴിയായി മാറി. മോഡല്‍ എൻജിനീയറിങ് കോളജില്‍ ഉള്‍പ്പെടെ നിരവധി സ്‌കൂള്‍ വാഹനങ്ങള്‍ കടന്നുപോകുന്ന റോഡിലാണ് യാത്രക്കാരുടെ ജീവന് ഭീഷണിയായി വന്‍ ഗര്‍ത്തം രൂപപ്പെട്ടത്. മഴ ശക്തമായതോടെ ദിവസവും കുഴിയുടെ അരികിടിഞ്ഞ് വലുതാകുന്നുണ്ട്. വലിയ വാഹനങ്ങള്‍ പോകുമ്പോള്‍ അപകടത്തിന് സാധ്യത ഏറെയാണ്. രാത്രി യാത്രക്കാരാണ് അപകടത്തിപ്പെടാന്‍ ഏറെ സാധ്യത. റോഡില്‍ വന്‍ ഗര്‍ത്തം രൂപപ്പെട്ടിട്ടും പൊലീസും നഗരസഭ അധികൃതരും മുന്‍ കരുതല്‍ നടപടി സ്വീകരിച്ചിട്ടില്ല. വാഹനങ്ങള്‍ അപകടത്തില്‍പ്പെടാതിരിക്കാന്‍ സമീപവാസികള്‍ കല്ല് വെച്ചിട്ടുണ്ട്. റോഡ് അറ്റകുറ്റപ്പണിക്ക് നടപടി സ്വീകരിക്കണമെന്നാണ് നാട്ടുകാരുടെ ആവശ്യം.