പൊതുപ്രവർത്തകർ ഉൾപ്പെട്ട ലോകായുക്​തയിലെ കേസുകൾ വേഗം തീർപ്പാക്കണമെന്ന്​ ഹൈകോടതി

കൊച്ചി: ലോകായുക്തയിെല പൊതുപ്രവർത്തകർ ഉൾപ്പെട്ട കേസുകൾ വേഗം തീർപ്പാക്കേണ്ടത് അനിവാര്യമെന്ന് ഹൈകോടതി. തനിക്കെതിരെ ലോകായുക്തയിലുള്ള കേസ് അനിശ്ചിതമായി വൈകുന്നതിനെതിരെ ഒല്ലൂർ മുൻ എം.എൽ.എ എം.പി. വിൻസ​െൻറ് നൽകിയ ഹരജിയാണ് ചീഫ് ജസ്റ്റിസ് അടങ്ങുന്ന ഡിവിഷൻ ബെഞ്ച് പരിഗണിച്ചത്. റെയിൽേവ ജോലി വാഗ്ദാനം ചെയ്ത് തട്ടിപ്പ് നടത്തിയെന്നാരോപിച്ച് ഹരജിക്കാരനെതിരെ 2014ൽ നൽകിയ കേസാണ് നിലവിലുള്ളത്. പാലക്കാട് എസ്.പിയുടെ അന്വേഷണത്തിൽ കേസുമായി തനിക്ക് ബന്ധമില്ലെന്ന് കണ്ടെത്തിയെന്നും തീർപ്പാക്കാതെ നീട്ടിക്കൊണ്ടുപോകുന്നത് പ്രതികൂലമായി ബാധിക്കുന്നെന്നുമാണ് ഹരജിയിൽ പറയുന്നത്. 2014ലെ പരാതിയാണെങ്കിലും ഇൗ വർഷം മാർച്ച് ഏഴിനാണ് റിപ്പോർട്ട് ലോകായുക്തക്ക് സമർപ്പിച്ചതെന്ന് ഹൈകോടതി വിലയിരുത്തി. എന്തു കാരണങ്ങളുണ്ടെങ്കിലും പൊതുപ്രവർത്തകർ ഉൾപ്പെട്ട കേസുകൾ അനിശ്ചിതമായി വൈകുന്നത് ശരിയായ നടപടിയല്ലെന്നും കോടതി വ്യക്തമാക്കി.