മതസൗഹാർദ നിറവിൽ മട്ടാ​​​​​േഞ്ചരിയിലെ നവരാത്രി ആഘോഷം

മട്ടാഞ്ചേരി: മിനി ഇന്ത്യ എന്നറിയപ്പെടുന്ന മട്ടാഞ്ചേരിയിൽ മതസൗഹാർദത്തി​െൻറ പ്രതീകമാണ് മഹാജനവാടിയിലെ ശ്രീ മഹാദേവി ക്ഷേത്രവും നവരാത്രി ആഘോഷവും. ഒന്നര നൂറ്റാണ്ട് മുമ്പ് കൊച്ചിയിലെത്തിയ ഒരു കൂട്ടം കർണാടക സ്വദേശികൾക്ക് കിടപ്പാടം നൽകിയത് നിയമസഭ ഡെപ്യൂട്ടി സ്പീക്കറായിരുന്ന എം.ജെ. സക്കരിയ സേട്ടി​െൻറ മുൻ തലമുറക്കാരായിരുന്നു. ഹാജി അഹമ്മദ് ഇബ്രാഹിം സേട്ട് വക ട്രസ്റ്റി​െൻറ മഹാജനവാടി പറമ്പിൽ ചെറിയ വാടകക്ക് വീടുകൾ നിർമിച്ചുനൽകി. ആരാധനക്ക് സൗകര്യം വേണമെന്ന അഭ്യർഥന മാനിച്ച് ക്ഷേത്രം നിർമിക്കാൻ സൗജന്യമായി സ്ഥലവും അനുവദിച്ചു. ഒമ്പത് ദിവസത്തെ നവരാത്രി ആഘോഷത്തിനുള്ള തിരക്ക് കണക്കിലെടുത്ത് നാല് സ​െൻറ് സ്ഥലവും വിട്ടുനൽകി. മറ്റവസരങ്ങളിൽ പൊതു ആവശ്യങ്ങൾക്കായും സ്ഥലം ഉപയോഗപ്പെടുത്തും. 130 വർഷമായി ഇവിടെയാണ് നവരാത്രി ആഘോഷങ്ങൾ നടക്കുന്നത്. ട്രസ്റ്റ് വക സ്ഥലം താമസക്കാർക്ക് വഖഫ് ബോർഡി​െൻറ മേൽനോട്ടത്തിൽ പതിച്ചുനൽകിയപ്പോഴും നവരാത്രി ആഘോഷിക്കുന്ന സ്ഥലം അങ്ങനെതന്നെ നിലനിർത്തിയിരിക്കുകയാണ്. ആഘോഷങ്ങൾക്കുള്ള പന്തൽ കെട്ടാനും അന്നദാനത്തിനും ചടങ്ങുകൾക്കുമൊക്കെ മുസ്ലിം യുവാക്കൾ മുൻപന്തിയിലുണ്ടെന്ന് ആഘോഷ കമ്മിറ്റി ചെയർമാൻ എൻ.സി. സുഭാഷ് പറഞ്ഞു. മതത്തി​െൻറ പേരിൽ അക്രമങ്ങൾ നടക്കുമ്പോൾ ഏകോദര സഹോദരങ്ങളെപ്പോലെയാണ് മഹാജനവാടിക്കാർ കഴിയുന്നത്. പൂജയും ഭജനയും ഉൾപ്പെടെ ചടങ്ങുകൾ കാണാൻ മുസ്ലിം സ്ത്രീകൾ ഉൾപ്പെടെ എത്തുന്നത് സാഹോദര്യത്തി​െൻറ തെളിവാണെന്നും അദ്ദേഹം പറഞ്ഞു.