ബൈപാസ് അടിപ്പാത സാമൂഹിക വിരുദ്ധരുടെ താവളം

ആലുവ: മെട്രോ സൗന്ദര്യവത്കരണം വഴിമുട്ടിയ . മേൽപാലത്തിന് താഴെയുള്ള ഭാഗം കുറ്റവാളികൾ കീഴടക്കുകയാണ്. നാടോടികളും ഭിക്ഷാടന മാഫിയയും ഇവിടെ വിലസുന്നു. മാലിന്യം നിറഞ്ഞതുമൂലം ഇൗ ഭാഗത്തേക്ക് ആരും തിരിഞ്ഞുനോക്കുന്നുമില്ല. ഇതിനിടെയാണ് കഴിഞ്ഞ ദിവസം കാനയിൽ അജ്ഞാത മൃതദേഹം കണ്ടെത്തിയത്. അഴുകിയ നിലയിൽ മൃതദേഹം കണ്ടെത്തിയതിൽ ദുരൂഹത സംശയിക്കുന്നു. രാത്രി ഈ മേഖല സാമൂഹികവിരുദ്ധരുടെ നിയന്ത്രണത്തിലാണെന്ന ആക്ഷേപം നേരത്തെയുള്ളതാണ്. പൊലീസ് പട്രോളിങ് ഉണ്ടെങ്കിലും കാര്യക്ഷമമല്ലെന്നാണ് ആക്ഷേപം. ഇതിനിടെയാണ് ഈ ഭാഗത്ത് മെട്രോ സൗന്ദര്യവത്കരണത്തിന് തുടക്കമിട്ടത്. എന്നാൽ, സി.പി.എം എതിർപ്പുമൂലം പദ്ധതി തടസ്സപ്പെട്ടിരിക്കുകയാണ്. വ്യാപാരി സംഘടനയും പദ്ധതിക്കെതിരാണ്. സൗന്ദര്യവത്കരണം തുടങ്ങിയതോടെ പരിസരവാസികൾക്കും യാത്രക്കാർക്കും ആശ്വാസമായതാണ്. മാർക്കറ്റ് പരിസരത്തുനിന്ന് മാലിന്യം ഒഴിഞ്ഞുകിട്ടുമെന്ന പ്രതീക്ഷയുമുണ്ടായിരുന്നു.