റോഡ്​ സഞ്ചാരയോഗ്യമാക്കി

മൂവാറ്റുപുഴ: കുണ്ടും കുഴിയുമായ നഗരത്തിലെ ബൈപാസ് റോഡ് ഇലാഹിയ കോളജിലെ സിവിൽ എൻജിനീയറിങ് വിദ്യാർഥികൾ സഞ്ചാരയോഗ്യമാക്കി. നഗരത്തിലെ ഏക ബൈപാസ് റോഡായ വെള്ളൂർക്കുന്നം -ഇ.ഇ.സി -കീച്ചേരിപ്പടി റോഡ് തകർന്നിട്ട് മാസങ്ങളായി. പല ഭാഗങ്ങളിലും വലിയ കുഴികൾ രൂപപ്പെട്ടതോടെ ഇരുചക്രവാഹനങ്ങളടക്കം വീണ് അപകടം പതിവാണ്. കഴിഞ്ഞ ദിവസം ബൈക്ക് യാത്രികനായ ഇലാഹിയ കോളജ് വിദ്യാർഥിക്ക് പരിക്കേറ്റിരുന്നു. ഇതോടെയാണ് വിദ്യാർഥികൾ കുഴികൾ മൂടാൻ ഇറങ്ങിയത്. വെള്ളൂർക്കുന്നം മുതൽ -കീച്ചേരി പടിവരെ ഒന്നര കി.മീറ്റർ റോഡി​െൻറ തകർന്ന ഭാഗങ്ങളിൽ ഇൻറർലോക്ക് കട്ടകൾ വിരിച്ചാണ് നന്നാക്കിയത്. വെള്ളൂർ കുന്നം മേഖലയിലായിരുന്നു വൻ കുഴികൾ. ഉച്ചയോടെ ആരംഭിച്ച പ്രവൃത്തി വൈകീട്ട് പൂർത്തിയായി. റോഡ് സഞ്ചാരയോഗ്യമാക്കണമെന്നാവശ്യപ്പെട്ട് നിരവധി സംഘടനകൾ രംഗത്തുവന്നിരുന്നെങ്കിലും നടപടിയൊന്നുമുണ്ടായിരുന്നില്ല. രണ്ടുപതിറ്റാണ്ടുമുമ്പ് ഇ.ഇ.സി മാർക്കറ്റ് സ്ഥാപിക്കുന്നതി​െൻറ ഭാഗമായി നഗരസഭ നിർമിച്ച റോഡി​െൻറ പകുതി ഭാഗം പൊതുമരാമത്ത് വകുപ്പി​െൻറ കീഴിലാണ്. റോഡ് ആരുേടതെന്ന തർക്കംമൂലം അറ്റകുറ്റപ്പണി നടത്താൻ ഇരു വകുപ്പുകളും തയാറാകുന്നില്ല.