ദേശീയപാതയിലെ മീഡിയനിലെ കൂറ്റൻ മരക്കുറ്റി മുറിച്ചുമാറ്റി

അരൂർ: ബൈപാസ് കവലയുടെ വടക്ക് ദേശീയപാതയിലെ മീഡിയനിൽ അപകടകരമായി നിലനിന്ന കൂറ്റൻ മരക്കുറ്റി മുറിച്ചുനീക്കി. മട്ടാഞ്ചേരിയിലെ ജയിൻ ഫൗണ്ടേഷൻ ചെയർമാൻ മുകേഷ് ജയിനും സംഘവുമെത്തിയാണ് മണ്ണുമാന്തി യന്ത്രവും യന്ത്രവാളും ഉപയോഗിച്ച് മുറിച്ചത്. രാത്രിയിൽ മരക്കുറ്റിയിൽ വാഹനങ്ങൾ ഇടിച്ച് അപകടങ്ങൾ ഉണ്ടാകുന്നത് ആവർത്തിച്ചിരുന്നു. ഒരുമാസത്തിനുള്ളിൽ മൂന്ന് അപകടമാണുണ്ടായത്. അരൂർ പൊലീസി​െൻറ അനുവാദം വാങ്ങിയശേഷമായിരുന്നു മരംമുറി. ഗതാഗതം നിയന്ത്രിക്കാൻ പൊലീസും എത്തിയിരുന്നു. മട്ടാഞ്ചേരി സ്വദേശികളായ അൻസാർ സീലാട്ട്, ജെ. സുരേഷ്, അരൂർ ഗ്രാമപഞ്ചായത്ത് അംഗങ്ങളായ കെ.എസ്. ശ്യാം, മോളി ജസ്റ്റിൻ എന്നിവരും മുകേഷ് ജയിനിനെ സഹായിക്കാൻ എത്തിയിരുന്നു.