ആത്മഹത്യ ചെയ്യാനായി പുഴയിൽ ചാടി; നാട്ടുകാർ ബഹളം വെച്ചപ്പോൾ നീന്തി കരക്കെത്തി

മൂവാറ്റുപുഴ: ആത്മഹത്യ ചെയ്യാനായി പുഴയിൽ ചാടിയ വീട്ടമ്മ ആളുകൾ ബഹളം വെച്ചതോടെ നീന്തി രക്ഷപ്പെട്ടു. നഗരത്തിലെ വലിയ പാലത്തിൽനിന്നും ചൊവ്വാഴ്ച വൈകീട്ട് നാല്മണിയോടെയാണ് പായിപ്ര സ്വദേശിനിയായ വീട്ടമ്മ പുഴയിൽ ചാടിയത്. തിരക്കേറിയ സമയമായതിനാൽ സംഭവം കണ്ട് നിരവധി പേർ പാലത്തിൽ തടിച്ചുകൂടി ബഹളം വെച്ചു. ഇതോടെ വിരണ്ടുപോയ വീട്ടമ്മ സ്വയം നീന്തി. സംഭവം കണ്ടുനിന്ന മറ്റൊരാളും ഇവരെ രക്ഷപ്പെടുത്താനായി പുഴയിൽ ചാടിയെങ്കിലും വീട്ടമ്മ നീന്തി ജനതകടവിൽ കയറുകയായിരുന്നു. ഇതിനിടെ നാട്ടുകാർ ഫയർഫോഴ്സിനെയും വിവരമറിയിച്ചിരുന്നു. ഇവർ സ്ഥലത്തെത്തിയപ്പോഴേക്കും വീട്ടമ്മ രക്ഷപ്പെട്ടിരുന്നു.