ഉറപ്പ് ലംഘിച്ചു; എം.എൽ.എയുടെ നേതൃത്വത്തിൽ കെ.എസ്​.ആർ.ടി.സി ബസ് സ്​റ്റാൻഡ് ഉപരോധിച്ചു സമരക്കാരെ പൊലീസ്​ അറസ്​റ്റ് ചെയ്ത്​ നീക്കി

പെരുമ്പാവൂർ: പെരുമ്പാവൂർ-മൂവാറ്റുപുഴ റൂട്ടിൽ രാത്രി സർവിസുകൾ നിർത്തിയതിനെതിരെ എൽദോസ് കുന്നപ്പിള്ളി എം.എൽ.എയുടെ നേതൃത്വത്തിൽ യൂത്ത് കോൺഗ്രസ് പ്രവർത്തകർ പെരുമ്പാവൂർ കെ.എസ്.ആർ.ടി.സി ബസ്സ്റ്റാൻഡ് ഉപരോധിച്ചു. മണിക്കൂറുകൾ നീണ്ട ഉപരോധത്തെ തുടർന്ന് പെരുമ്പാവൂർ പൊലീസ് എത്തി സമരക്കാരെ അറസ്റ്റ് ചെയ്ത് നീക്കി. പെരുമ്പാവൂർ-മൂവാറ്റുപുഴ റൂട്ടിലെ രാത്രി സർവിസുകൾ അടക്കം വെട്ടിക്കുറച്ച സർവിസുകൾ പുനരാരംഭിക്കണമെന്നാവശ്യപ്പെട്ട് കഴിഞ്ഞ ആഴ്ച യൂത്ത് കോൺഗ്രസ് പ്രവർത്തകർ കെ.എസ്.ആർ.ടി.സി ബസ് പിടിച്ചെടുത്ത് സമരം ചെയ്തിരുന്നു. സമരത്തെ തുടർന്ന് അടുത്ത ദിവസം മുതൽ നിർത്തലാക്കിയ സർവിസുകൾ പുനരാരംഭിക്കുമെന്ന് ഉറപ്പുനൽകിയിരുന്നെങ്കിലും നടപടി ഉണ്ടായില്ല. ഈ സാഹചര്യത്തിലാണ് എം.എൽ.എയുടെ നേതൃത്വത്തിൽ ഉപരോധം സംഘടിപ്പിച്ചത്. ശനിയാഴ്ച രാത്രി എേട്ടാടെ ആരംഭിച്ച ഉപരോധം 10.30നാണ് അവസാനിച്ചത്. ഇതിനിടയിൽ പെരുമ്പാവൂർ കെ.എസ്.ആർ.ടി.സി സ്റ്റാൻഡിൽ എത്തിയ ദീർഘദൂര ബസുകൾ അടക്കം സമരക്കാർ തടഞ്ഞുെവച്ചു. അധികൃതരുമായി നടത്തിയ ചർച്ചക്കൊടുവിൽ തിങ്കളാഴ്ചമുതൽ ബസ് സർവിസുകൾ പുനരാരംഭിക്കുമെന്ന് അറിയിച്ചു. ഇനിയും വാക്കുമാറ്റം ഉണ്ടായാൽ സമരം ഏറ്റെടുത്ത് അനിശ്ചിതകാലം ബസ്സ്റ്റാൻഡ് ഉപരോധിക്കുമെന്നും പ്രവർത്തകർ പറഞ്ഞു. ഉപരോധത്തിന് ടി.ജി. സുനിൽ, ഷിജോ വർഗീസ്, ചെറിയാൻ ജോർജ്, പോൾ പാത്തിക്കൽ, അബ്ദുൽ നിസാർ, ജോജോ കീഴില്ലം, കെ.വി. ജൈസൺ, ഷാജി കുന്നത്താൻ, ഐസക് തുരുത്തിയിൽ എന്നിവർ നേതൃത്വം നൽകി.