സിഗരറ്റ് വാങ്ങാനെന്ന വ്യാജേനയെത്തി മാല കവര്‍ന്നു

തൃപ്പൂണിത്തുറ:- കടയില്‍ സിഗരറ്റ് വാങ്ങാനെന്ന വ്യാജേന ബൈക്കില്‍ എത്തിയ യുവാക്കള്‍ കടയുടമയായ സ്ത്രീയുടെ നാലര പവ​െൻറ മാല പൊട്ടിച്ചു കടന്നുകളഞ്ഞു. ചിത്രപ്പുഴ ട്രാന്‍സ്ഫോര്‍മറിന് സമീപം സ്റ്റേഷനറി കട നടത്തുന്ന ഒലിപ്പുറത്ത് ജോയിയുടെ ഭാര്യ മോളിയുടെ (56) മാലയാണ് നഷ്ടപ്പെട്ടത്. ശനിയാഴ്ച വൈകീട്ട് നാേലാടെയായിരുന്നു സംഭവം. ബൈക്കില്‍ കടയിലെത്തിയ യുവാക്കളില്‍ ഒരാള്‍ ഇറങ്ങിവന്ന് സിഗരറ്റ് വേണമെന്നാവശ്യപ്പെട്ടു. സിഗരറ്റ് കൊടുക്കുമ്പോള്‍ യുവാവ് മാല പൊട്ടിച്ചെടുത്ത് നിര്‍ത്തിയിരുന്ന ബൈക്കിന് പിന്നില്‍ കയറി രക്ഷപ്പെടുകയായിരുന്നു. ഉടൻ പൊലീസില്‍ വിവരമറിയിച്ചു. മോഷ്ടാക്കളെ പിടികൂടാന്‍ കഴിഞ്ഞിട്ടില്ല. ഏകദേശം 25 വയസ്സുള്ള പല്ല് പൊങ്ങിയ യുവാവാണ് മാല പൊട്ടിച്ചെടുത്തതെന്ന് മോളി പൊലീസിനോട് പറഞ്ഞു.