കാറ്റ് നാശം വിതച്ചു

മൂവാറ്റുപുഴ: ആയവന പഞ്ചായത്തിലും . 12-ാം വാര്‍ഡില്‍ കുഴുമ്പിത്താഴത്ത് വീശിയടിച്ച ചുഴലിക്കാറ്റ് വന്‍ നാശമാണ് വിതച്ചത്. രാവിലെ ഒമ്പതോടെ ആരംഭിച്ച മഴക്ക് പിറകെ എത്തിയ ചുഴലിക്കാറ്റില്‍ റബര്‍, തേക്ക് മരങ്ങൾ നിലംപൊത്തി. മൂവാറ്റുപുഴ ബ്ലോക്ക് ഫെഡറേറ്റഡ് സമിതിയുടെ ഹൈടെക് പോളിഹൗസ് നഴ്‌സറി തകര്‍ന്നു. 5000 സ്‌ക്വയര്‍ ഫീറ്റിലുള്ള നഴ്സറിയാണ് തകർന്നത്. 'ഓണത്തിന് ഒരുമുറം പച്ചക്കറി' പദ്ധതി പ്രകാരം തക്കാളി, പച്ചമുളക്, വഴുതന തുടങ്ങിയ ഹൈബ്രിഡ് വിത്തുപയോഗിച്ച് അറുപതിനായിരത്തോളം തൈകള്‍ പോളിഹൗസില്‍ നിറച്ചുകൊണ്ടിരുന്ന തൊഴിലാളികളും ഉടമയും പോളിഹൗസ് തകർന്നതോടെ ഓടി രക്ഷപ്പെടുകയായിരുന്നു. ഏകദേശം 15 ലക്ഷം രൂപയുടെ നഷ്ടം കണക്കാക്കുന്നു. കല്ലൂര്‍ക്കാട് നാഗപ്പുഴ കുന്നത്തോട്ടേല്‍ വീട്ടില്‍ ടോയ്‌സി​െൻറ വീടിന് മുകളില്‍ റബര്‍മരം വീണ് ഒരുഭാഗം പൂര്‍ണമായും തകര്‍ന്നു. നാഗപ്പുഴ പള്ളിയുടെ നിരവധി റബര്‍, ആഞ്ഞിലി, തേക്ക് തുടങ്ങിയവ കാറ്റില്‍ കടപുഴകി. റബര്‍, ജാതി, ആഞ്ഞിലി, തേക്ക് മുതലായവ മറിഞ്ഞ് തൈമറ്റം കുടുംബത്തിന് ലക്ഷങ്ങളുടെ നാശനഷ്ടമുണ്ടായി.