തകർന്ന കെട്ടിടത്തിൽ ഭീതിയോടെ ഒമ്പത് കുടുംബങ്ങൾ

മട്ടാഞ്ചേരി: ബംഗ്ലാവ് പറമ്പിലെ ബംഗ്ലാവ് കെട്ടിടത്തി​െൻറ മേൽക്കൂര തകർന്നതോടെ ഒമ്പത് കുടുംബങ്ങളാണ് ഭീതിയോടെ കെട്ടിടത്തിൽ കഴിയുന്നത്. ഓടുമേഞ്ഞ പൗരാണിക കെട്ടിടമായതിനാൽ തറയിൽനിന്ന് ഏതാണ്ട് 15 മീറ്ററോളം ഉയരത്തിലാണ് മേൽക്കൂര പണിതിരിക്കുന്നത്. കെട്ടിടത്തി​െൻറ മധ്യഭാഗം പൊതു ആവശ്യങ്ങൾ, കുട്ടികൾക്ക് കളിക്കാൻ ഇടം എന്ന രീതിയിലാണ് നിർമിച്ചിരിക്കുന്നത്. ഈ നടുത്തളത്തിന് നാല് ചുറ്റുമായാണ് ഒമ്പത് കുടുംബങ്ങൾ താമസിച്ചു വരുന്നത്. നടുത്തളത്തിന് നേരേ മുകളിലുള്ള മർമപ്രധാനമായ ഭാഗം തകർന്നതോടെ ഒമ്പത് വീടുകളും സുരക്ഷിതമല്ലാത്ത അവസ്ഥയിലാണ്. എങ്കിലും മറ്റെങ്ങും പോകാൻ ഇടമില്ലാത്ത അവസ്ഥയിൽ കുഞ്ഞുങ്ങളുമായി ഈ വീടുകളിൽതന്നെ കഴിയുകയാണ് കുടുംബങ്ങൾ. കനത്ത മഴ ഇവരുടെ ഭീതി വർധിപ്പിക്കുകയാണ്. കെട്ടിടം തകർന്നുവീണതറിഞ്ഞ് റവന്യൂ അധികൃതരും ദുരന്തനിവാരണ വിഭാഗവും സ്ഥലത്തെത്തിയെങ്കിലും നഗരസഭയിൽനിന്ന് അധികൃതർ എത്താതിരുന്നത് ഏറെ പ്രതിഷേധത്തിന് ഇടയാക്കി. ഒരു കൂരക്ക് താഴെയാണ് ഈ കുടുംബങ്ങൾ എന്നതിനാൽ ഓരോ വീട്ടുകാരും താമസിക്കുന്ന ഭാഗം പണിയുക എന്നത് പ്രതിസന്ധി സൃഷ്ടിക്കും.