കുമ്പളം^തേവര ഫെറി നിരക്ക് കൂട്ടി സർവിസ് മുടങ്ങില്ലെന്ന് കരാറുകാരൻ

കുമ്പളം-തേവര ഫെറി നിരക്ക് കൂട്ടി സർവിസ് മുടങ്ങില്ലെന്ന് കരാറുകാരൻ നെട്ടൂർ: കുമ്പളം-തേവര ഫെറി ബോട്ട് സർവിസ് മുടങ്ങുമെന്ന പ്രചാരണങ്ങൾക്കിടെ കരാറുകാരൻ ബുധനാഴ്ചയും സർവിസ് നടത്തി. ടിക്കറ്റ് നിരക്ക് വർധിപ്പിച്ചതിൽ പ്രതിഷേധമുണ്ടാകുമെന്ന കാരണത്താൽ സർവിസ് ഉണ്ടാകുന്നതല്ല എന്ന തരത്തിൽ പ്രചാരണം നടന്നതാണ് നാട്ടുകാരെ കുഴപ്പത്തിലാക്കിയത്. നിലവിലുള്ള അഞ്ച് രൂപയിൽനിന്ന് പത്ത് രൂപയാക്കി വർധിപ്പിക്കണമെന്നാണ് കരാറുകാരൻ ആവശ്യപ്പെട്ടതെങ്കിലും പഞ്ചായത്ത് കമ്മിറ്റി ഏഴ് രൂപയാക്കിയാണ് വർധന വരുത്തിയത്. പഞ്ചായത്ത് അംഗമായ കെ.ആർ. പ്രസാദ് മാത്രമാണ് നിരക്ക് വർധനയെ എതിർത്തതെന്നും ന്യായമായ വർധന മാത്രമാണ് വരുത്തിയിട്ടുള്ളതെന്നും പഞ്ചായത്ത് പ്രസിഡൻറ് ഷേർളി ജോർജ് അറിയിച്ചു.