റിഫൈനറി വികസന പ്രവര്‍ത്തനം: പരാതികള്‍ ആഗസ്​റ്റിൽ പരിഗണിക്കും

ആലുവ: റിഫൈനറിയില്‍ സുരക്ഷ സംവിധാനങ്ങള്‍ ഒരുക്കാതെ നടക്കുന്ന വികസന പ്രവര്‍ത്തനങ്ങള്‍ക്കെതിരെയുള്ള പരാതികള്‍ ആഗസ്റ്റിൽ ഒന്നിച്ച് പരിഗണിക്കാന്‍ മനുഷ്യാവകാശ കമീഷന്‍ തീരുമാനിച്ചു. റിഫൈനറിക്ക് ചുറ്റും സുരക്ഷവലയം (ഗ്രീന്‍ ബെല്‍റ്റ്) നിർമിക്കാൻ അധികൃതര്‍ തയാറാകുന്നില്ല. ഇത് നിർമിക്കാതെ പുതിയ കെട്ടിടങ്ങളില്‍ പ്രവര്‍ത്തനം ആരംഭിക്കരുതെന്നാണ് പരാതിക്കാരുടെ ആവശ്യം. പ്രദേശത്തെ അഞ്ച് റെസിഡൻറ്‌സ് അസോസിയേഷനുകളാണ് പരാതി നല്‍കിയത്. ഗ്രീന്‍ ബെല്‍റ്റ് ആവശ്യമാണെന്ന് പി.സി.ബിയും കമീഷന് റിപ്പോര്‍ട്ട് നല്‍കിയിട്ടുണ്ട്. മൊത്തം 32 കേസുകൾ തീർപ്പാക്കി. 94 കേസുകളാണ് പരിഗണിച്ചത്. 13 എണ്ണം പുതിയവയാണ്.