പാലം തുറക്കണമെന്നാവശ്യപ്പെട്ട് ടയർ ഉന്തി പ്രതിഷേധം

പള്ളുരുത്തി: കണ്ണേങ്ങാട്ട് -ഐലൻഡ് പാലം ഗതാഗതത്തിന് തുറന്ന് കൊടുക്കണമെന്നാവശ്യപ്പെട്ട് യൂത്ത് കോൺഗ്രസ് പ്രവർത്തകരുടെ നേതൃത്വത്തിൽ പാലത്തിലൂടെ ടയർ ഉന്തി പ്രതിഷേധിച്ചു. നിർമാണം പൂർത്തിയായ പാലത്തി​െൻറ അപ്രോച് റോഡി​െൻറ ഏതാനും മീറ്റർ ടാർ ചെയ്യുന്ന ജോലിയാണ് ബാക്കിയുള്ളത്. ഇത് അധികൃതർ മനഃപൂർവം വൈകിപ്പിക്കുകയാണെന്നും എത്രയും പെട്ടെന്ന് തുറന്ന് കൊടുക്കണമെന്നും ആവശ്യപ്പെട്ടായിരുന്നു പ്രതിഷേധം. 2014 ഒക്ടോബറിൽ നിർമാണം ആരംഭിച്ച പാലം 18 മാസത്തിനുള്ളിൽ ഗതാഗതത്തിന് തുറന്ന് കൊടുക്കുമെന്നാണ് പ്രഖ്യാപിച്ചിരുന്നത്. സമയപരിധിക്കുശേഷവും ഇപ്പോൾ മാസങ്ങൾ നീണ്ടുപോകുന്ന അവസ്ഥയിലാണെന്നും പ്രതിഷേധക്കാർ പറഞ്ഞു. യൂത്ത് കോൺഗ്രസ് സംയുക്ത ബൂത്ത് കമ്മിറ്റികളുടെ ആഭിമുഖ്യത്തിൽ സംഘടിപ്പിച്ച പ്രതിഷേധം കോൺഗ്രസ് ബ്ലോക്ക് സെക്രട്ടറി അഭിലാഷ് തോപ്പിൽ ഉദ്ഘാടനം ചെയ്തു. എം.എസ്. വിഷ്ണുദാസ് അധ്യക്ഷത വഹിച്ചു. വി.കെ. അരുൺകുമാർ, ജോസ് സനൽ, ഒമർ ഷെരീഫ്, കെ.എ. യേശുദാസ്, ഷാരൂൺ ആൻറണി, ഗോഡ്വിൻ റൊസാരിയോ തുടങ്ങിയവർ നേതൃത്വം നൽകി.