പാര്‍ക്കിങ്​ സൗകര്യമില്ല; കണ്ടെയ്‌നര്‍ ലോറികള്‍ അനിശ്ചിതകാല പണിമുടക്കിലേക്ക്

കൊച്ചി: കണ്ടെയ്‌നര്‍ ലോറികള്‍ അനിശ്ചിതകാല പണിമുടക്കിലേക്ക്. വല്ലാര്‍പാടം ടെര്‍മിനലില്‍ ചരക്കുമായി എത്തുന്ന കണ്ടെയ്‌നറുകള്‍ക്ക് പാര്‍ക്കിങ് സൗകര്യം ഏര്‍പ്പെടുത്താത്തതില്‍ പ്രതിഷേധിച്ചാണ് ഇന്ന് അർധരാത്രി മുതല്‍ സമരം പ്രഖ്യാപിച്ചിരിക്കുന്നത്. മധ്യകേരളത്തിലേക്ക് കൂടുതല്‍ ചരക്കുകള്‍ എത്തുന്നത് വല്ലാര്‍പാടം ടെര്‍മിനല്‍ വഴിയാണ്. കണ്ടെയ്‌നര്‍ ഉടമകള്‍ സമരം പ്രഖ്യാപിച്ചതോടെ മധ്യകേരളത്തിലേക്കുള്ള ചരക്ക് നീക്കം പ്രതിസന്ധിയിലാകും. 800 കണ്ടെയ്‌നറുകളാണ് ദിവസേന വല്ലാര്‍പാടത്ത് എത്തുന്നത്. ഇവ റോഡിനിരുവശവുമാണ് പാര്‍ക്ക് ചെയ്തിരുന്നത്. എന്നാല്‍, കഴിഞ്ഞ ദിവസം ജില്ല കലക്ടര്‍ കണ്ടെയ്‌നര്‍ റോഡിലെ പാര്‍ക്കിങ് നിരോധിച്ചതോടെ മറ്റിടങ്ങളില്ലാത്ത അവസ്ഥയിലാണ് വാഹനങ്ങള്‍. കലക്ടറുടെ ഉത്തരവി​െൻറ ചുവട്പിടിച്ച റോഡില്‍ പാര്‍ക്ക് ചെയ്ത ലോറികള്‍ക്ക് പൊലീസ് വന്‍തുകയാണ് പിഴ ചുമത്തുന്നത്. ഡ്രൈവര്‍മാര്‍ക്ക് വിശ്രമ മുറികളും ലോറികള്‍ക്ക് പാര്‍ക്കിങ് സ്ഥലവും നല്‍കണമെന്നാവശ്യപ്പെട്ട് കഴിഞ്ഞ വര്‍ഷം ജൂണിലും ലോറി ഉടമകള്‍ സമരം നടത്തിയിരുന്നു. അന്ന്് സര്‍ക്കാറി​െൻറ മധ്യസ്ഥതയില്‍ തുറമുഖ വകുപ്പ് ഇക്കാര്യത്തില്‍ ഉടന്‍ തീരുമാനമെടുക്കുമെന്ന് അറിയിെച്ചങ്കിലും കാര്യമായ പുരോഗതിയുണ്ടായില്ല. നിലവില്‍ 150 ലോറികൾക്കുള്ള പാര്‍ക്കിങ് സൗകര്യമാണ് ഒരുക്കിയിരിക്കുന്നത്. കണ്ടെയ്‌നര്‍ വാഹനങ്ങള്‍ക്ക് പാര്‍ക്കിങ് സൗകര്യം വാഹന ഉടമകള്‍തന്നെ കണ്ടെത്തണമെന്ന തുറമുഖ അധികൃതരുടെ നിലപാട് അംഗീകരിക്കാനാകില്ലെന്ന് കണ്ടെയ്‌നര്‍ ഓണേഴ്‌സ് കോ-ഓഡിനേഷന്‍ കമ്മിറ്റി വാര്‍ത്തസമ്മേളനത്തില്‍ പറഞ്ഞു. സമരത്തിലേക്ക് നീങ്ങുകയാണെന്ന് കാണിച്ച് കലക്ടര്‍ക്ക് നോട്ടീസ് നല്‍കിയെങ്കിലും ചര്‍ച്ചക്ക് വിളിച്ചിട്ടില്ലെന്നും ഉടമകള്‍ പറയുന്നു.