പാചകവാതക സിലിണ്ടറുകളില്‍ തൂക്കക്കുറവ്

പറവൂര്‍: ഗാര്‍ഹിക ഉപയോഗത്തിനുള്ള പാചകവാതക സിലിണ്ടറുകളില്‍ തൂക്കത്തില്‍ കുറവ് കണ്ടത്തെി. മന്നം ചന്തപ്പാടം പ്രദേശത്ത് വിതരണത്തിന് കൊണ്ടുവന്ന ഐ.ഒ.സിയുടെ സിലിണ്ടറുകളിലാണ് നിശ്ചിത തൂക്കത്തില്‍ കുറവുണ്ടായത്. വിതരണക്കാര്‍ കൊണ്ടുവന്ന സിലിണ്ടറുകള്‍ സീല്‍ പൊട്ടിക്കാതെ വിതരണക്കാരുടെ മുന്നില്‍ വെച്ചാണ് നാട്ടുകാര്‍ തൂക്കി നോക്കിയത്. ഒരോ സിലിണ്ടറിലും 200 മുതല്‍ 300 ഗ്രാം വരെ പാചകവാതകം കുറവായിരുന്നു. ഈ പ്രദേശത്തെ അഞ്ച് കുടുംബങ്ങള്‍ക്ക് നല്‍കുന്നതിനുവേണ്ടി കൊണ്ടുവന്നതാണ് സിലിണ്ടറുകള്‍. വീടുകളില്‍ നിശ്ചിത ദിവസത്തിനുള്ളില്‍ ഗ്യാസ് തീരുന്നതില്‍ സംശയം തോന്നിയാണ് നാട്ടുകാര്‍ സിലിണ്ടര്‍ തൂക്കി നോക്കാന്‍ തയാറായത്.ഏജന്‍സികളുടെ ഗോഡൗണുകളില്‍ എത്തുന്നതിനു മുമ്പ് സംഭവിച്ചതാകാമെന്നാണ് നിഗമനം. ഇതുസംബന്ധിച്ച് കലക്ടര്‍ക്ക് നാട്ടുകാര്‍ പരാതി നല്‍കിയിട്ടുണ്ട്.