മുടക്കിയത് ഒന്നരക്കോടി; മത്സ്യ മാർക്കറ്റ് ഇപ്പോൾ കാലിത്തൊഴുത്ത്

മൂവാറ്റുപുഴ: രണ്ടുവർഷം മുമ്പ് കൊട്ടിഘോഷിച്ച് ഉദ്ഘാടനം ചെയ്ത നഗരസഭയുടെ ആധുനിക മത്സ്യ മാർക്കറ്റ് കാലിത്തൊഴുത്തായി. ഒന്നരക്കോടി രൂപ െചലവിൽ കേന്ദ്ര ഫിഷറീസ് വകുപ്പി​െൻറ സഹായത്തോടെ നഗരസഭ നിർമിച്ച ആധുനിക മത്സ്യ മാർക്കറ്റാണ് കാലിത്തൊഴുത്തായി മാറിയിരിക്കുന്നത്. കഴിഞ്ഞ കൗൺസിലി​െൻറ അവസാന സമയത്ത് ഉദ്ഘാടന മാമാങ്കം നടത്തിയെങ്കിലും മാർക്കറ്റ് ഇതുവരെ തുറന്നുകൊടുത്തിട്ടില്ല. ശീതീകരണ സംവിധാനങ്ങൾ അടക്കം എല്ലാ ആധുനിക സൗകര്യങ്ങളോടുകൂടിയാണ് മാർക്കറ്റ് നിർമിച്ചത്. കഴിഞ്ഞ കുറെ ദിവസമായി കന്നുകാലി വ്യാപാരികൾ ഇവയെ മഴ നനയാതെ കെട്ടുന്നത് ഈ കെട്ടിടത്തിലാണ്. നഗരത്തിൽ അലയുന്ന കാലികളും ഭിക്ഷാടകരും സന്ധ്യയാകുന്നതോടെ ഇവിടെ തമ്പടിക്കുന്നതും പതിവായി. ഇതിനു പുറമെ മയക്കുമരുന്ന് മാഫിയയും സജീവമാണ്. മുനിസിപ്പൽ സ്റ്റേഡിയത്തിനു സമീപം 20 സ​െൻറ് സ്ഥലത്ത് നിർമിച്ച മാർക്കറ്റിന് ഇതുവരെ ചുറ്റുമതിൽ നിർമിക്കാൻ അധികൃതർ തയാറായിട്ടില്ല. വിജനമായ സ്ഥലത്ത് സ്ഥിതിചെയ്യുന്ന മാർക്കറ്റി​െൻറ മുറ്റത്ത് സൂക്ഷിച്ചിരുന്ന നഗരസഭയുടെ ടാർ മോഷണംപോയ സംഭവം വിവാദമായതോടെ ചുറ്റുമതിൽ നിർമാണം നടത്തുമെന്ന് അധികൃതർ പറഞ്ഞിരുന്നെങ്കിലും നടന്നില്ല. പൊതുഖജനാവിൽനിന്ന് കോടികൾ മുടക്കി നിർമിച്ച മാർക്കറ്റ് അടിയന്തരമായി തുറന്നുകൊടുക്കണമെന്ന ആവശ്യവും ശക്തമായി.