കനത്ത മഴ; നന്നാക്കിയ റോഡുകൾ വീണ്ടും തകർന്നു

മൂവാറ്റുപുഴ: രണ്ടു ദിവസമായി പെയ്യുന്ന കനത്ത മഴയെത്തുടർന്ന് നഗരത്തിലെ റോഡുകൾ വീണ്ടും തകർന്നു. പരാതിയെത്തുടർന്ന് രണ്ടാഴ്ച മുമ്പ് അറ്റകുറ്റപ്പണി ചെയ്ത ഭാഗങ്ങളിലാണ് റോഡ് പൂർണമായി തകർന്നത്. എം.സി റോഡിലെ നെഹ്റു പാർക്കിലാണ് ഏറ്റവും വലിയ കുഴി രൂപപ്പെട്ടിരിക്കുന്നത്. വളവിലെ കുഴിയിൽ വീണ് നിരവധി ഇരുചക്രവാഹന യാത്രക്കാർക്കാണ് പരിക്കേൽക്കുന്നത്. വലിയ പാലം, വെള്ളൂർക്കുന്നം, പുളിഞ്ചുവട് കവല തുടങ്ങിയ ഭാഗങ്ങളിലും റോഡ് തകർന്നിട്ടുണ്ട്. ഇതോടെ ഗതാഗതക്കുരുക്കും അപകടങ്ങളും പെരുകുകയാണ്.