മഅ്ദനി: കർണാടക നിലപാടിനെതിരെ ഭിക്ഷയെടുത്ത് പ്രതിഷേധം

പെരുമ്പാവൂർ: അബ്ദുന്നാസിർ മഅ്ദനിയുടെ സുരക്ഷച്ചെലവ് വഹിക്കാൻ കഴിയില്ലെന്നുപറഞ്ഞ കർണാടക സർക്കാറിനെതിരെ പ്രതീകാത്മകമായി ഭിക്ഷയെടുത്ത് പ്രതിഷേധിച്ചു. എസ്.ഐ.ഒ ജില്ല കമ്മിറ്റിയാണ് പെരുമ്പാവൂരിൽ വേറിട്ട പ്രതിഷേധ പരിപാടി സംഘടിപ്പിച്ചത്. മഅ്ദനിയുടെ സുരക്ഷച്ചെലവിലേക്ക് ലക്ഷങ്ങൾ കെട്ടിെവക്കണമെന്ന കർണാടക സർക്കാറി​െൻറ നിലപാട് കടുത്ത നീതിനിഷേധമാണെന്ന് സംഗമം ഉദ്ഘാടനം ചെയ്ത് ജില്ല പ്രസിഡൻറ് മുഫീദ് കൊച്ചി പറഞ്ഞു. കേരളത്തിലേക്ക് വരാനുള്ള മഅ്ദനിയുടെ അവകാശത്തെ തടയാനുള്ള ശ്രമമാണ് കർണാടക സർക്കാർ നിരന്തരം നടത്തുന്നതെന്നും ഈ വിഷയത്തിൽ സുപ്രീംകോടതി നിരീക്ഷണങ്ങൾ സ്വാഗതാർഹമാണെന്നും അദ്ദേഹം കൂട്ടിച്ചേർത്തു. ജില്ല സെക്രട്ടറി ഇസ്ഹാഖ് അസ്ഹരി, സെക്രേട്ടറിയറ്റ് അംഗം പി.എം. നൗഫൽ എന്നിവർ സംസാരിച്ചു. റിസ്വാൻ പെരിങ്ങാല, ബാസിത് ചെമ്പറക്കി, മുജീബ് എടത്തല, നബീൽ പെരുമ്പാവൂർ തുടങ്ങിയവർ നേതൃത്വം നൽകി.