അപകടത്തിൽനിന്ന്​ രക്ഷിച്ച ഫയർഫോഴ്സിന് നന്ദി പറയാൻ മത്തായി എത്തി

കോതമംഗലം: ആശുപത്രി വിട്ടപ്പോൾ മത്തായി നേരെ എത്തിയത് അപകടത്തിൽനിന്ന് തന്നെ രക്ഷപ്പെടുത്തിയ ഫയർഫോഴ്സ് ജീവനക്കാരോട് നന്ദി പറയാൻ. കഴിഞ്ഞ വെള്ളിയാഴ്ചയാണ് മരംവെട്ടുകാരനായ കുട്ടമ്പുഴ മോളേക്കുടി മത്തായി (56) ബോധക്ഷയമുണ്ടായി 80 അടി ഉയരമുള്ള മരത്തിന് മുകളിൽ കുടുങ്ങിയത്. കോതമംഗലം ഫയർഫോഴ്‌സിലെ അംഗങ്ങൾ മരത്തിന് മുകളിൽനിന്ന് മത്തായിയെ സാഹസികമായി താഴെ എത്തിച്ച് പ്രാഥമിക ശുശ്രൂഷ നൽകി ആംബുലൻസിൽ ഓക്സിജൻ സൗകര്യമൊരുക്കി കോതമംഗലത്തെ സ്വകാര്യ ആശുപത്രിയിൽ എത്തിക്കുകയായിരുന്നു. ഫയർഫോഴ്സി​െൻറ കൃത്യമായ ഇടപെടലാണ് മത്തായിയുടെ ജീവൻ രക്ഷിച്ചത്. രക്ഷകരായ ഫയർഫോഴ്സ് സംഘത്തോടൊപ്പം ഉച്ചഭക്ഷണം കഴിച്ചാണ് മത്തായി മടങ്ങിയത്.