അനാമികയുടെ ചികിത്സ: കാരുണ്യ സ്പര്‍ശമായി രംഗം തിയറ്റേഴ്സിന്‍െറ കൈകൊട്ടിക്കളി

വൈപ്പിന്‍: എടവനക്കാട് താമരവട്ടം സ്വദേശിനിയായ അനാമികയുടെ ചികിത്സാ സഹായ നിധി സ്വരൂപിക്കുന്നതിന് വിവിധ സംഘടനകള്‍ രംഗത്ത്. ദ്വീപിലെ കൈകൊട്ടിക്കളി സംഘമായ പുതുവൈപ്പ് രംഗം തിയറ്റേഴ്സിലെ കലാകാരന്മാരാണ് കാരുണ്യ സ്പര്‍ശവുമായി അരങ്ങേറ്റം നടത്തുന്നത്. ശനിയാഴ്ച പള്ളത്താംകുളങ്ങര ക്ഷേത്ര മൈതാനിയില്‍ വൈകുന്നേരം 4.30നാണ് അരങ്ങേറ്റം. ഈ ജീവന്‍ നമുക്കു രക്ഷിക്കാം - എല്ലാവരും ഒത്തു ചേര്‍ന്ന് കൈകോര്‍ക്കാം എന്ന ആഹ്വാനവുമായി പുതുവൈപ്പിലെ രാധാകൃഷ്ണന്‍െറ നേതൃത്വത്തിലാണ് കൈകൊട്ടിക്കളി അവതരിപ്പിക്കുന്നത്. എട്ടു മാസം പ്രായമായ അനാമികയുടെ കരള്‍ ശസ്ത്രക്രിയ നടത്താനാണ് പണം സ്വരൂപിക്കുന്നത്. ബസ്, ഓട്ടോ, ടാക്സി സര്‍വിസ് രംഗത്തെ തൊഴിലാളികള്‍ പണം സ്വരൂപിക്കാന്‍ സജീവമാണ്. ഗായക സംഘങ്ങള്‍ അടക്കം വിവിധ കലാകാരന്മാരും സഹായധനം സ്വരൂപിച്ചതായി സമിതി ചെയര്‍മാന്‍ എടവനക്കാട് പഞ്ചായത്ത് പ്രസിഡന്‍റ് കെ.യു. ജീവന്‍ മിത്ര അറിയിച്ചു.