മാര്‍ക്കറ്റില്‍ അവശനിലയില്‍ കഴിഞ്ഞ വൃദ്ധനെ ആശുപത്രിയിലാക്കി

ആലുവ: മാര്‍ക്കറ്റില്‍ അവശനിലയില്‍ കഴിഞ്ഞിരുന്ന വൃദ്ധനെ ആശുപത്രിയിലാക്കി. ആലുവ സ്വദേശി സലിം (47) എന്നയാളെയാണ് എ.ഐ.വൈ.എഫ് പ്രവര്‍ത്തകരുടെ നേതൃത്വത്തില്‍ ജില്ലാ ആശുപത്രിയിലാക്കിയത്. പഴയ മാര്‍ക്കറ്റില്‍ വ്യാപാരഭവന് താഴെ കഴിഞ്ഞ മൂന്നു ദിവസമായി സലിം കഴിയുകയായിരുന്നു. തീരെ അവശനായി കാണപ്പെട്ടതിനെ തുടര്‍ന്ന് മാര്‍ക്കറ്റിലെ വ്യാപാരികളും മറ്റും അറിയിച്ചതിനെ തുടര്‍ന്നാണ് ഇവിടെ നിന്ന് കോണ്ടുപോയത്. സലിമിന് കാലിന് സ്വാധീനമില്ല. അനാഥനെപോലെ കഴിഞ്ഞിരുന്ന സലിമിന് ആലുവ മാധവപുരത്ത് ബന്ധുക്കളുള്ളതായാണ് അറിയുന്നത്. എ.ഐ.വൈ.എഫ് നേതാക്കളായ ജോബി മാത്യു, എം.എ.യൂസുഫ്, കെ.കെ.രമേശ്, രാജീവ് ഡൊമിനിക്, ചുമട് തൊഴിലാളികളായ ഹമീദ്, മീതീന്‍, വ്യാപാരഭവന്‍ ആംബുലന്‍സ് ഡ്രൈവര്‍ നിയാസ് എന്നിവര്‍ ചേര്‍ന്നാണ് ആശുപത്രിയിലേക്ക് മാറ്റിയത്.