വഴിയോരങ്ങളില്‍ മാലിന്യം കുന്നുകൂടുന്നു

കായംകുളം: നഗര വഴിയോരങ്ങളില്‍ മാലിന്യം കുന്നുകൂടുന്നത് കച്ചവടക്കാരെയും യാത്രക്കാരെയും വലക്കുന്നു. പച്ചക്കറി അവശിഷ്ടങ്ങള്‍ അടക്കമുള്ളവ ചീഞ്ഞളിഞ്ഞ് ദുര്‍ഗന്ധം വമിക്കുകയാണ്. കച്ചവടക്കാര്‍ തന്നെയാണ് സൗകര്യപ്രദമെന്നനിലയില്‍ റോഡരികില്‍ മാലിന്യം തള്ളുന്നത്. ഇതിനോടൊപ്പം പലരും മത്സ്യ-മാംസാവശിഷ്ടങ്ങളും ഇവിടെ നിക്ഷേപിക്കുന്നു. പ്രധാന ജങ്ഷനുകള്‍തന്നെ മാലിന്യനിക്ഷേപ കേന്ദ്രമായി മാറി. പ്രതാംഗമൂട് ജങ്ഷനില്‍ മാലിന്യംമൂലം രൂക്ഷമായ ദുര്‍ഗന്ധമാണ്. ‘ഡെങ്കിപ്പനി ഇവിടെ ലഭിക്കു’മെന്ന പ്രതിഷേധ പോസ്റ്ററുകളും മാലിന്യത്തിന് മുകളില്‍ വലിച്ചുകെട്ടിയിട്ടുണ്ട്. ദുര്‍ഗന്ധം കാരണം പരിസരത്തെ ചില കടകള്‍ തുറക്കാതായിട്ടുണ്ട്. വിഷയത്തിന് അടിയന്തര പരിഹാരം കാണണമെന്നാണ് പരിസരവാസികള്‍ ആവശ്യപ്പെടുന്നത്.