നിയമലംഘനം നടത്തുന്ന ടൂറിസ്റ്റ് ബോട്ടുകള്‍ക്കെതിരെ നടപടി തുടങ്ങി

കൊച്ചി: യാത്രക്കാരുടെ പൊതു സുരക്ഷയെ മുന്‍നിര്‍ത്തി, നിയമലംഘനം നടത്തുന്ന ടൂറിസ്റ്റ് ബോട്ടുകള്‍ക്കെതിരെ തീരദേശ പൊലീസ് നിരീക്ഷണം ശക്തമാക്കി. സുരക്ഷാ ക്രമീകരണങ്ങള്‍ പാലിക്കാതെ സര്‍വിസ് നടത്തിയ മിനാര്‍ 2 എന്ന ടൂറിസ്റ്റ് ബോട്ട് കോസ്റ്റല്‍ പൊലീസ് പിടികൂടി. ബോട്ടിലെ സ്രാങ്ക് വടക്കേക്കര കുറുപ്പശ്ശേരി വീട്ടില്‍ കെ.എസ്. മണിയെ അറസ്റ്റുചെയ്തു. ബോട്ടിന്‍െറ മുകള്‍ ഭാഗത്ത് (അപ്പര്‍ ഡെസ്ക് ) മൂന്നില്‍ ഒന്ന് എന്ന ക്രമത്തിലേ യാത്രക്കാരെ കയറ്റാന്‍ പാടുള്ളൂവെന്ന് നിര്‍ദേശമുണ്ട്. ലൈഫ് ജാക്കറ്റ് ധരിപ്പിക്കാതെയാണ് ഈ ബോട്ടില്‍ മുഴുവന്‍ യാത്രക്കാരെയും മുകളില്‍ കയറ്റിയത്. തുടര്‍ നടപടിക്കായി ബോട്ടുസഹിതം ഹാര്‍ബര്‍ പൊലീസിന് കൈമാറി. ആവശ്യമായ ലൈഫ് ജാക്കറ്റ് , ലൈഫ് ബോയ്, ബോയിന്‍റ അപ്പാരറ്റസ്, അഗ്നിശമനയന്ത്രം തുടങ്ങിയ സുരക്ഷാ ക്രമീകരണങ്ങള്‍ ഇല്ലാതെ സര്‍വിസ് നടത്തുന്ന ബോട്ടുകള്‍ക്കെതിരെ ശക്തമായ നടപടി ഉണ്ടാകും. ലൈഫ് ജാക്കറ്റ് ധരിപ്പിക്കാതെ യാത്രക്കാരെ കയറ്റുന്ന ടൂറിസ്റ്റ് ബോട്ടുകള്‍ക്കെതിരെ നടപടി എടുക്കുമെന്ന് തീരദേശ പൊലീസ് അറിയിച്ചു. കോസ്റ്റല്‍ സി.ഐ എ. അനന്തലാല്‍, എസ്.ഐ രമേശ്, സി.പി.ഒ പ്രദീപ് എന്നിവരുടെ നേതൃത്വത്തിലാണ് നടപടി സ്വീകരിച്ചത്.