പറവൂര്‍ മുസ്രിസ് വള്ളംകളി: തുരുത്തിപ്പുറം ജേതാക്കള്‍

പറവൂര്‍: പറവൂരിന്‍െറയും ചെറിയ പല്ലംതുരുത്തിന്‍െറയും ഇരുകരകളിലും തടിച്ചുകൂടിയ ആയിരക്കണക്കായ ജലോത്സവ പ്രേമികളെ ആവേശംകൊള്ളിച്ച് തട്ടുകടവ് പുഴയില്‍ നടന്ന പറവൂര്‍ മുസ്രിസ് വള്ളം കളിയില്‍ എ വിഭാഗത്തില്‍ താന്തോന്നിത്തുരുത്ത് ബോട്ട് ക്ളബിന്‍െറ തുരുത്തിപ്പുറം ജേതാക്കളായി. ബി വിഭാഗത്തില്‍ തൈക്കുടം ബോട്ട് ക്ളബിന്‍െറ ശ്രീമുരുകന്‍ വിജയിച്ചു. ക്വാര്‍ട്ടറിലും സെമിയിലും ഇഞ്ചോടിഞ്ച് പോരാട്ടമാണ് നടന്നതെങ്കില്‍ എ വിഭാഗത്തില്‍ തൃശൂര്‍ വടക്കന്‍ ബ്രദേഴ്സിനെ വള്ളപ്പാടുകളുടെ വ്യത്യാസത്തിലാണ് കെ.ആര്‍. രതീഷിന്‍െറ നേതൃത്വത്തിലുള്ള തുരുത്തിപ്പുറം പരാജയപ്പെടുത്തിയത്. ബി വിഭാഗത്തില്‍ ആദ്യവസാനം ഒപ്പത്തിനൊപ്പം നടത്തിയ പോരാട്ടത്തിനൊടുവില്‍ വടുതല കുറുങ്കോട്ട ബോട്ട് ക്ളബിന്‍െറ ജി.എം.എസ് രണ്ടാംസ്ഥാനം കൊണ്ട് തൃപ്തിപ്പെടേണ്ടിവന്നു. എ വിഭാഗത്തില്‍ തുരുത്തിപ്പുറം ബോട്ട് ക്ളബിന്‍െറ ഹനുമാന്‍ നമ്പര്‍ വണ്ണും ബി വിഭാഗത്തില്‍ മടപ്ളാതുരുത്ത് ഒരുമ ബോട്ട് ക്ളബിന്‍െറ ജിബി തട്ടകനും മൂന്നാം സ്ഥാനം നേടി. എ വിഭാഗത്തില്‍ ഏറ്റവും നല്ല അമരക്കാരനായി തുരുത്തിപ്പുറം വള്ളത്തിലെ ബാലകൃഷ്ണനും മികച്ച അണിയക്കാരനായി തുരുത്തിപ്പുറം വള്ളത്തിലെ സുരേഷും തെരഞ്ഞെടുക്കപ്പെട്ടു. ബി വിഭാഗത്തില്‍ നല്ല അമരക്കാരന്‍ ശ്രീമുരുകന്‍ വള്ളത്തിലെ സുബ്ബയ്യനും അണിയക്കാരന്‍ ജി.എം.എസിന്‍െറ ഒന്നാം തുഴക്കാരനായ വിഷ്ണുവുമാണ്. ചെറിയപല്ലം തുരുത്ത് പ്രിയദര്‍ശിനി കലാ സാംസ്കാരിക സമിതിയാണ് ജലോത്സവം സംഘടിപ്പിച്ചത്. അബൂദബി എവര്‍സേഫ് ഗ്രൂപ്പ് ഓഫ് കമ്പനീസ് സ്പോണ്‍സര്‍ ചെയ്ത തത്തപ്പിള്ളി മാനടിയില്‍ കുമാരന്‍ ആന്‍ഡ് ജാനകി കുമാരന്‍ മെമ്മോറിയല്‍ റോളിങ് ട്രോഫിയും പ്രിയദര്‍ശിനി മുസിരിസ് എവര്‍ റോളിങ് ട്രോഫിയുമാണ് വിജയികള്‍ക്ക് സമ്മാനിച്ചത്. ക്ളബ് രക്ഷാധികാരി ദിനേശന്‍ മണലിപറമ്പില്‍ പതാക ഉയര്‍ത്തി. വി.ഡി. സതീശന്‍ എം.എല്‍.എ ഉദ്ഘാടനം ചെയ്തു. ക്ളബ് രക്ഷാധികാരി എം.ജെ. രാജു അധ്യക്ഷത വഹിച്ചു. മുന്‍ എം.പി കെ.പി. ധനപാലന്‍ ഫ്ളാഗ് ഓഫ് ചെയ്തു. എവര്‍ സേഫ് എം.ഡി എം.കെ. സജീവ് തുഴ കൈമാറി. പ്രിന്‍സ് തോമസ്, വത്സല പ്രസന്നകുമാര്‍, എം.പി. പോള്‍സണ്‍, ജെബി രാജു, ടി.എസ്. രാജുന്‍, ലൈജോ ജോണ്‍സണ്‍, സുനിത രാജന്‍, വ്യാസ് തോമസ്, അജിത്ത് വടക്കേടത്ത്, ജയന്‍ കാളിയേക്കാട്ട്, മഹേശന്‍, ജോമോന്‍ ഉറുമ്പത്ത്, ടി.കെ. ജയപാല്‍ എന്നിവര്‍ സംസാരിച്ചു. വിജയികള്‍ക്ക് എവര്‍സേഫ് ഗ്രൂപ്പ് ഓഫ് കമ്പനീസ് എം.ഡി എം.കെ. സജീവ്, പറവൂര്‍ മുനിസിപ്പല്‍ ചെയര്‍മാന്‍ രമേശ് ഡി കുറുപ്പ് എന്നിവര്‍ ചേര്‍ന്ന് ട്രോഫികള്‍ സമ്മാനിച്ചു.