പകലോമറ്റം മോസ്കോ റോഡ് തകര്‍ച്ചയില്‍

ആലുവ: കീഴ്മാട് പഞ്ചായത്തില്‍ ആലുവ-പെരുമ്പാവൂര്‍ റോഡിലെ പകലോമറ്റത്തുനിന്ന് ചാലക്കല്‍ മോസ്കോ പ്രദേശത്തേക്കുള്ള റോഡ് തകര്‍ന്നു. റോഡിനുസമീപം പ്രവര്‍ത്തിക്കുന്ന ക്രഷറില്‍നിന്ന് കരിങ്കല്ലും മറ്റും കൊണ്ടുപോകാന്‍ വലിയ ലോറികള്‍ വരെ എത്തുന്നതാണ് റോഡ് തകര്‍ച്ചക്കിടയാക്കുന്നത്. നിത്യേന നൂറുകണക്കിനു ട്രിപ്പ് ഈ റോഡിലൂടെ പോകുന്നതിനാല്‍ ടാറിങ് നടത്തിയാലും ഫലമില്ലാതാവുകയാണ്. റോഡ് തകര്‍ച്ചക്ക് കാരണക്കാരായ ക്രഷറുകാര്‍തന്നെ റോഡ് ഉറപ്പേറിയ രീതിയില്‍ കോണ്‍ക്രീറ്റ് ചെയ്ത് സംരക്ഷിക്കണമെന്നാണ് നാട്ടുകാര്‍ ആവശ്യപ്പെടുന്നത്. റോഡിനുസമീപം നിന്ന ഒരു വൈദ്യുതി പോസ്റ്റ് ലോറികളുടെ സഞ്ചാരത്തിന് തടസ്സമായിരുന്നു. ക്രഷറുകാര്‍ക്കുവേണ്ടി ഈ പോസ്റ്റ് സമീപത്തെ വീട്ടുവളപ്പിലേക്ക് മാറ്റിയിടുകയായിരുന്നു. പിന്നീട് നാട്ടുകാര്‍ പ്രതിഷേധിച്ചതോടെ വീണ്ടും നീക്കിയിട്ടിരുന്നു. റോഡ് തകര്‍ന്നതിനാല്‍ അത്യാവശ്യഘട്ടങ്ങളില്‍ പോലും ഓട്ടോറിക്ഷ വരുന്നില്ളെന്ന് നാട്ടുകാര്‍ പരാതിപ്പെടുന്നു.