ബസ് കാത്തിരിപ്പ് കേന്ദ്രം അപകട ഭീഷണിയില്‍

കാഞ്ഞങ്ങാട്: ബസ് കാത്തിരിപ്പ് കെട്ടിടം തുരുമ്പെടുത്ത് അപകട ഭീഷണിയാവുന്നു. പെരിയ അങ്ങാടിയിലെ ബസ് കാത്തിരിപ്പ് കേന്ദ്രമാണ് കോണ്‍ക്രീറ്റ് അടര്‍ന്നുവീണ് കമ്പികള്‍ പ്രത്യക്ഷമായ രീതിയിലുള്ളത്. ദേശീയപാതയില്‍ പുല്ലൂര്‍-പെരിയ പഞ്ചായത്തില്‍പെടുന്ന കാത്തിരിപ്പ് കേന്ദ്രം ഏതുസമയത്തും നിലംപൊത്താന്‍ സാധ്യതയുണ്ട്. കോണ്‍ക്രീറ്റുകള്‍ പല ഭാഗത്തുനിന്നും അടര്‍ന്ന് കമ്പികള്‍ തുരുമ്പെടുത്തിട്ടുണ്ട്. കാസര്‍കോട്, കാഞ്ഞങ്ങാട് ഭാഗത്തേക്ക് പോകേണ്ടവര്‍ ബസ് കാത്തിരിക്കുന്ന സ്ഥലമാണിത്.മൂന്നാംകടവ്, അമ്പലത്തറ, കല്യോട്ട് തുടങ്ങിയ ഭാഗങ്ങളിലേക്ക് യാത്ര ചെയ്യുന്നവരും ബസിനായി ഇവിടെയാണ് നില്‍ക്കാറ്. തുരുമ്പെടുത്ത പഴയ ബസ്സ്റ്റോപ് കെട്ടിടം പൊളിച്ചുനീക്കി പുതുതായി നിര്‍മിക്കണമെന്ന നാട്ടുകാരുടെ ആവശ്യം ശക്തമായിട്ടുണ്ട്.