അക്രമം: ഉള്ളാളില്‍ നിരോധാജ്ഞ

മംഗളൂരു: ഉള്ളാള്‍ തീരത്ത് യുവാവിനെ വെട്ടിപ്പരിക്കേല്‍പിച്ച സംഭവത്തില്‍ ഒരാളെ അറസ്റ്റ് ചെയ്തതായി സിറ്റി പൊലീസ് കമീഷണര്‍ ചന്ദ്രശേഖര്‍ വാര്‍ത്താസമ്മേളനത്തില്‍ അറിയിച്ചു. ഉള്ളാളിനടുത്ത കുമ്പളയിലെ ഇലക്ട്രിക്കല്‍ തൊഴിലാളി ശിവറാം എന്ന ശിവനാണ് (19) ബുധനാഴ്ച അറസ്റ്റിലായത്. തിങ്കളാഴ്ച പുലര്‍ച്ചെ നാലുമണിയോടെ ബൈക്കില്‍ സഞ്ചരിക്കുകയായിരുന്ന ഇബ്രാഹിം നഫ്സലിനെ (25) അഞ്ചംഗ സംഘം തടഞ്ഞുനിര്‍ത്തി ആക്രമിക്കുകയായിരുന്നു. നിസാം(19), സഫ്വാന്‍ (20), സലിം (24) എന്നിവര്‍ക്കും വ്യത്യസ്ത അക്രമങ്ങളില്‍ പരിക്കേറ്റതായി കമീഷണര്‍ പറഞ്ഞു. ഇബ്രാഹിമിന്‍െറ കൈവിരലുകള്‍ അറ്റുപോവുകയും കാലുകള്‍ക്ക് ഗുരുതര പരിക്കേല്‍ക്കുകയും ചെയ്തു. സംഭവത്തത്തെുടര്‍ന്ന് സംഘര്‍ഷം നിലനില്‍ക്കുന്ന ഉള്ളാള്‍ പൊലീസ് സ്റ്റേഷന്‍ പരിധിയില്‍ നിരോധാജ്ഞ പ്രഖ്യാപിച്ചു. 600 പൊലീസുകാരെയും 10 പ്ളാറ്റൂണ്‍ സംസ്ഥാന റിസര്‍വ് പൊലീസ് സേനയെയും വിന്യസിച്ചതായി കമീഷണര്‍ പറഞ്ഞു. അസി. പൊലീസ് കമീഷണര്‍ കല്യാണ്‍ ഷെട്ടി, ക്രൈംബ്രാഞ്ച് എസ്.ഐ വാലന്‍റയിന്‍ ഡിസൂസ എന്നിവര്‍ക്ക് അന്വേഷണ ചുമതല നല്‍കി. സംഘര്‍ഷ മേഖലയില്‍ പൊലീസ് റൂട്ട്മാര്‍ച്ച് നടത്തി.