നീലേശ്വരം കുടുംബശ്രീ വിപണന കേന്ദ്രം അടഞ്ഞുതന്നെ

നീലേശ്വരം: നഗര മധ്യത്തില്‍ നഗരസഭ കുടുംബശ്രീക്ക് പണിത കെട്ടിടം അടഞ്ഞുകിടക്കുന്നു. മെയിന്‍ ബസാര്‍ ബസ് സ്റ്റോപ്പിന് തെക്കുഭാഗത്താണ് കെട്ടിടം പണിതത്. ആറ് വര്‍ഷമായി കെട്ടിടം അടഞ്ഞുകിടക്കുന്നു. 2010ല്‍ പഞ്ചായത്ത് പ്രസിഡന്‍റായിരുന്ന കെ.വി. ദാമോദരന്‍െറ നേതൃത്വത്തിലുള്ള ഭരണ സമിതിയാണ് കെട്ടിടം നിര്‍മിച്ചത്. ലക്ഷങ്ങള്‍ ചെലവഴിച്ച് നിര്‍മിച്ചതല്ലാതെ വിപണനം നടന്നില്ല. വിഷുവിന് കുടുംബശ്രീക്കാര്‍ സ്വന്തം കെട്ടിടം ഉപയോഗിക്കാതെ രാജാ റോഡരികിലാണ് വില്‍പന നടത്തിയത്. ഇതിന്‍െറ പേരില്‍ അംഗങ്ങള്‍ക്കിടയില്‍ തന്നെ അഭിപ്രായ വ്യത്യാസമുണ്ടായി. പുതിയ നഗരസഭാ ഭരണസമിതിയും കുടുംബശ്രീ സി.ഡി.എസും നിലവില്‍ വന്നിട്ടും കെട്ടിടം നോക്കുകുത്തിയായി കിടക്കുന്നു.