നീലേശ്വരം പൊലീസ് സ്റ്റേഷന്‍ വളപ്പ് വാഹനങ്ങളുടെ ശവപ്പറമ്പായി

നീലേശ്വരം: പൊലീസ് പിടിച്ചെടുത്ത വാഹനങ്ങളുടെ ശവപ്പറമ്പായി മാറുകയാണ് നീലേശ്വരം പൊലീസ് സ്റ്റേഷന്‍ വളപ്പ്. ലോറികള്‍ നിറഞ്ഞതുമൂലം ദേശീയപാതയോരത്താണ് വാഹനങ്ങള്‍ ഇപ്പോള്‍ പാര്‍ക്ക് ചെയ്യുന്നത്. മണല്‍ക്കടത്തിന് പിടികൂടിയ ലോറികളാണ് കൂടുതലും. 200ലധികം ലോറികള്‍ ഇവിടെ നശിച്ചുകൊണ്ടിരിക്കുന്നു. പിടിച്ചെടുത്ത വാഹനങ്ങളുടെ കേസുകള്‍ കോടതിയില്‍ വര്‍ഷങ്ങളായി കിടക്കുന്നതുമൂലം ഉടമകള്‍ക്ക് ലക്ഷങ്ങളുടെ നഷ്ടമാണ്. നീലേശ്വരം പൊലീസ് സ്റ്റേഷന് അകത്തും പുറത്തുമായി ഒരുകോടിയിലധികം രൂപയുടെ വാഹനങ്ങളാണ് നശിച്ചുകൊണ്ടിരിക്കുന്നത്. പിടിച്ചെടുത്ത വാഹനങ്ങളില്‍നിന്ന് ടയര്‍, ബാറ്ററി എന്നിവ മോഷണം പോകുന്നതും നിത്യസംഭവമാണ്.