മാവിന്‍തൈ വിതരണംചെയ്ത് ഭാഗ്യക്കുറി ഓഫിസ് ജീവനക്കാര്‍

കണ്ണൂർ: ആവശ്യക്കാര്‍ക്ക് സൗജന്യമായി മാവിന്‍തൈകള്‍ വിതരണംചെയ്ത് ജീവനക്കാരുടെ കൂട്ടായ്മ. ജില്ല ഭാഗ്യക്കുറി ഓ ഫിസിലെ ജീവനക്കാരുടെ ഹരിതകൂട്ടായ്മയാണ് മാവിന്‍തൈകള്‍ ഉല്‍പാദിപ്പിച്ച് ആവശ്യക്കാര്‍ക്ക് വിതരണം ചെയ്യുന്നത്. ബപ്പായ, നമ്പ്യാര്‍, ഗോമാങ്ങ, നാട്ടുമാങ്ങ, പുളിയന്‍മാങ്ങ തുടങ്ങി വിവിധയിനത്തില്‍പെട്ട അഞ്ഞൂറോളം തൈകളാണ് തയാറാക്കിയത്. ഓഫിസിലെ ജീവനക്കാരുടെ വീടുകളില്‍ ഉല്‍പാദിപ്പിച്ച തൈകള്‍ക്ക് ആവശ്യക്കാർ ഏറിവരുകയാണ്. കണ്ണൂര്‍, കാസര്‍കോട് ജില്ലകളില്‍നിന്നായി നിരവധി പേരാണ് ദിനംപ്രതി മാവിന്‍തൈക്കായി ജില്ല ഭാഗ്യക്കുറി ഓഫിസിലെത്തുന്നത്. ജൂലൈ 31വരെ മാവിന്‍തൈകള്‍ വിതരണം ചെയ്യും. മാവിന്‍തൈകളുടെ വിതരണം ജില്ല ഭാഗ്യക്കുറി ഓഫിസര്‍ അശോകന്‍ പാറക്കണ്ടി നിർവഹിച്ചു. ഭാഗ്യക്കുറി ക്ഷേമ ഓഫിസര്‍ ഡി. സുനില്‍കുമാര്‍, ജൂനിയര്‍ സൂപ്രണ്ട് മനോജ് സൈമണ്‍, പി.കെ. ദീപേഷ്, എന്‍. സുരേന്ദ്രന്‍, കെ. അശോകന്‍ തുടങ്ങിയവര്‍ പങ്കെടുത്തു.