കടകളുടെ മുകളിൽ മരംവീണു

കൂത്തുപറമ്പ്: തൊക്കിലങ്ങാടിയിൽ റോഡരികിലെ കൂറ്റൻ തണൽമരം കടകൾക്ക് മുകളിലേക്ക് കടപുഴകി. ഇന്നലെ രാവിലെ 9.30ഓടെയുണ്ടായ മഴയിലാണ് നിടുംപൊയിൽ റോഡിലെ തണൽമരം കടപുഴകിയത്. മരത്തിൻെറ കൂറ്റൻ ശിഖരം സമീപത്തെ കടക്കും വൈദ്യുതി ലൈനിലും തട്ടി നിന്നതിനാലാണ് ദുരന്തം വഴിമാറിയത്. കൂത്തുപറമ്പിൽനിന്ന് ഫയർഫോഴ്സെത്തി നാട്ടുകാരുടെ സഹായത്തോടെ ശിഖരങ്ങൾ മുറിച്ചുനീക്കി. മരം വീണതിനെ തുടർന്ന് കൂത്തുപറമ്പ്-നിടുംപൊയിൽ റൂട്ടിൽ ഏറെനേരം വാഹന ഗതാഗതം തടസ്സപ്പെട്ടു. പ്രദേശത്തെ വൈദ്യുതി വിതരണവും തടസ്സപ്പെട്ടു.