കോളിക്കടവ് -പായം -കാടമുണ്ട റോഡ് നിർമാണം മന്ദഗതിയിൽ

ഇരിട്ടി: കോളിക്കടവ്-പായം-കാടമുണ്ട റോഡിൻെറ നിർമാണ പ്രവൃത്തി മന്ദഗതിയിൽ. പൊടിശല്യവും യാത്രാക്ലേശവും കാരണം നാട്ടുകാർ ദുരിതത്തിൽ. പ്രധാനമന്ത്രി ഗ്രാമ സഡക് യോജന പദ്ധതിയിൽ ഉൾപ്പെടുത്തി നാലുകോടി രൂപ ചെലവിൽ നിർമിക്കുന്ന റോഡ് പ്രവൃത്തിയാണ് ഇഴഞ്ഞുനീങ്ങുന്നത്. കോളിക്കടവ് മുതൽ വട്ട്യറ-പായം-കാടമുണ്ട വരെയുള്ള ആറു കിലോമീറ്റർ റോഡ് പ്രവൃത്തി ആരംഭിച്ചിട്ട് മൂന്നുമാസം കഴിഞ്ഞു. കാടമുണ്ടയിൽ നിന്നും കരിയാൽ വരെയാണ് ആദ്യഘട്ട പ്രവൃത്തി നടക്കുന്നത്. മൂന്നുമാസം മുമ്പ് പഴയ റോഡിലെ ടാറിങ് ഇളക്കി കരിങ്കൽ ഉൾപ്പെടെ നിരത്തിയിരുന്നു. ഇപ്പോൾ ഈ മേഖലയിൽ പൊടിശല്യം രൂക്ഷമാണ്. ഇതുവഴിയുള്ള ബസ് ഗതാഗതവും ഇപ്പോൾ നിലച്ചിരിക്കുകയാണ്. ഉടൻ ടാറിങ് പൂർത്തീകരിച്ചില്ലെങ്കിൽ മഴയെത്തുന്നതോടെ റോഡ് ചളിക്കുളമാകും. റോഡ് പ്രവൃത്തിയുടെ ഭാഗമായി കലുങ്കുകളും നിർമിക്കാനുണ്ട്.