ജില്ല ബി ഡിവിഷൻ ലീഗ് ക്രിക്കറ്റ് ഫൈനൽ ഇന്ന്

തലശ്ശേരി: ജില്ല ബി ഡിവിഷൻ ലീഗ് ക്രിക്കറ്റിൽ വ്യാഴാഴ്ച ആദ്യസെമിയിൽ ടെലിച്ചറി ടൗൺ ക്രിക്കറ്റ് ക്ലബ് നാലു വിക്കറ ്റിന് തലശ്ശേരി കോസ്മോസ് ക്രിക്കറ്റ് ക്ലബിനെ പരാജയപ്പെടുത്തി ഫൈനലിൽ കടന്നു. ആദ്യം ബാറ്റ് ചെയ്ത കോസ്മോസ് ക്രിക്കറ്റ് ക്ലബ് നിശ്ചിത 20 ഓവറിൽ എട്ടു വിക്കറ്റ് നഷ്ടത്തിൽ 116 റൺസെടുത്തു. തുടർന്ന് ബാറ്റ് ചെയ്ത ടെലിച്ചറി ടൗൺ ക്രിക്കറ്റ് ക്ലബ് 19 ഓവറിൽ ആറു വിക്കറ്റ് നഷ്ടത്തിൽ വിജയലക്ഷ്യം നേടി. രണ്ടാം സെമിയിൽ തലശ്ശേരി ബി.കെ 55 ക്രിക്കറ്റ് അക്കാദമി 19 റൺസിന് തിരുവങ്ങാട് ഫീനിക്സ് ക്രിക്കറ്റ് ക്ലബിനെ പരാജയപ്പെടുത്തി ഫൈനലിൽ കടന്നു. ആദ്യം ബാറ്റ് ചെയ്ത ബി.കെ 55 ക്രിക്കറ്റ് അക്കാദമി നിശ്ചിത 20 ഓവറിൽ 117 റൺസിന് എല്ലാവരും പുറത്തായി. തുടർന്ന് ബാറ്റ് ചെയ്ത ഫീനിക്സിന് 20 ഓവറിൽ ഒമ്പതു വിക്കറ്റ് നഷ്ടത്തിൽ 97 റൺസ് എടുക്കാനേ സാധിച്ചുള്ളൂ. മൂന്നു വിക്കറ്റും 26 റൺസുമെടുത്ത് ബി.കെ 55 ക്രിക്കറ്റ് അക്കാദമി താരം പി. ജസ്ബീറും പുറത്താകാതെ 16 റൺസും രണ്ടു വിക്കറ്റും നേടി ടെലിച്ചറി ടൗൺ ക്രിക്കറ്റ് ക്ലബ് താരം ആസിഫ് അബ്ദുല്ലയും കളിയിലെ താരങ്ങളായി. വെള്ളിയാഴ്ച രാവിലെ ജില്ല സി ഡിവിഷൻ ലീഗ് ക്രിക്കറ്റിൽ തലശ്ശേരി മലബാർ അത്്ലറ്റിക് ക്ലബ്, കണ്ണൂർ ഫോർട്ട് ക്രിക്കറ്റ് ക്ലബ് ബി ടീമിനെ നേരിടും. ഉച്ചക്ക് ബി ഡിവിഷൻ ലീഗ് ഫൈനലിൽ ടെലിച്ചറി ടൗൺ ക്രിക്കറ്റ് ക്ലബ് തലശ്ശേരി ബി.കെ 55 ക്രിക്കറ്റ് അക്കാദമിയെ നേരിടും.