ക്ഷേമ പെൻഷൻ അട്ടിമറി: മുസ്​ലിംലീഗ്​ സായാഹ്ന ധർണ

കണ്ണൂർ: കേട്ടുകേൾവിയില്ലാത്ത പുതിയ മാനദണ്ഡങ്ങൾ സൃഷ്ടിച്ച് പാവപ്പെട്ടവർക്ക് ക്ഷേമപെൻഷൻ നിഷേധിച്ച ഇടതുപക്ഷ സർക്കാർ നടപടിയിൽ പ്രതിഷേധിച്ച് മുസ്ലിംലീഗ് സംസ്ഥാന കമ്മിറ്റിയുടെ ആഹ്വാനപ്രകാരം ജില്ലയിൽ പഞ്ചായത്ത് മുനിസിപ്പൽ കേന്ദ്രങ്ങളിൽ സായാഹ്ന ധർണ നടത്തി. നാറാത്ത് പഞ്ചായത്തിലെ കണ്ണാടിപ്പറമ്പിൽ നടന്ന ധർണ സംസ്ഥാന ലീഗ് വൈസ് പ്രസിഡൻറ് വി.കെ. അബ്ദുൽ ഖാദർ മൗലവി ഉദ്ഘാടനംചെയ്തു. വേങ്ങാട് ടൗണിൽ സംസ്ഥാന സെക്രട്ടറി അബ്ദുറഹ്മാൻ കല്ലായിയും കണ്ണൂർ മണ്ഡലം ലീഗ് കമ്മിറ്റിയുടെ ആഭിമുഖ്യത്തിൽ കാൽടെക്സിൽ നടന്ന ധർണ ജില്ല ലീഗ് പ്രസിഡൻറ് പി. കുഞ്ഞിമുഹമ്മദും കക്കാട് നടന്ന പുഴാതി മേഖലയിലെ ധർണ ജില്ല ജനറൽ സെക്രട്ടറി അഡ്വ. അബ്ദുൽ കരീം ചേലേരി, വളപട്ടണത്ത് ട്രഷറർ വി.പി വമ്പനും ഉദ്ഘാടനംചെയ്തു. ജില്ല ഭാരവാഹികളായ അഡ്വ. പി.വി. സൈനുദ്ദീൻ മുഴപ്പിലങ്ങാട് പഞ്ചായത്തിലെ എടക്കാട് ടൗണിലും ഇബ്രാഹിം മുണ്ടേരി മുഴക്കുന്നിലും കെ.വി. മുഹമ്മദലി ഹാജി മാട്ടൂലിലും കെ.ടി. സഹദുല്ല പയ്യന്നൂരിലും അഡ്വ. കെ.എ. ലത്തീഫ് തലശ്ശേരിയിലും കെ.പി. താഹിർ ചക്കരക്കല്ലിലും എസ്.ടി.യു ദേശീയ വൈസ് പ്രസിഡൻറ് എം.എ. കരീം പള്ളിക്കുന്ന് മേഖലയിലെ ചാലാട് ടൗണിലും ധർണ ഉദ്ഘാടനംചെയ്തു.