പ്രാഥമിക നഷ്​ടപരിഹാരം മുഴുവൻ ദുരിതബാധിതർക്കും നൽകണം

കണ്ണൂർ: മഴക്കെടുതിമൂലം ദുരിതമനുഭവിച്ച മുഴുവൻപേർക്കും സർക്കാറി​െൻറ പ്രാഥമിക നഷ്ടപരിഹാരമായ 10,000 രൂപ നൽകാൻ അടിയന്തരനടപടി സ്വീകരിക്കണമെന്ന് വെൽഫെയർ പാർട്ടി ജില്ല ദുരിതാശ്വാസ കർമസമിതി ആവശ്യപ്പെട്ടു. ദുരിതം കാരണം ക്യാമ്പിൽ കഴിഞ്ഞവരെപ്പോലും നഷ്ടപരിഹാരം ലഭിക്കേണ്ടുന്നവരുടെ ലിസ്റ്റിൽനിന്ന് ഒഴിവാക്കാനുള്ള ശ്രമം പ്രതിഷേധാർഹമാണ്. വെള്ളം കയറിയതുമൂലവും ഉരുൾപൊട്ടൽ ഭീഷണിമൂലവും മറ്റേത് കാരണത്താലും ദുരിതമനുഭവിച്ചവരെല്ലാവരും നഷ്ടപരിഹാരത്തിന് അർഹരാണ്. സാങ്കേതിക കാരണങ്ങൾ പറഞ്ഞ് ദുരിതബാധിതർക്കിടയിൽ വിവേചനം കാണിക്കാനാണ് നീക്കമെങ്കിൽ ശക്തമായ ജനകീയ പ്രക്ഷോഭത്തെ നേരിടേണ്ടിവരുമെന്ന് കർമസമിതി മുന്നറിയിപ്പ് നൽകി. സൈനുദ്ദീൻ കരിവെള്ളൂർ അധ്യക്ഷത വഹിച്ചു. ബർണ്ണബാസ് ഫെർണാണ്ടസ്, എ. അഹ്മദ് കുഞ്ഞി, എം. ഖദീജ, പള്ളിപ്രം പ്രസന്നൻ, പി.വി. സാബിറ എന്നിവർ സംസാരിച്ചു.