പാനൂർ ടാക്സി സ്​റ്റാൻഡ്​ മാറ്റുന്നതിനെതിരെ ഡ്രൈവർമാർ

പാനൂർ: നഗരത്തിലെ ടാക്സി സ്റ്റാൻഡ് മാറ്റുന്നതുമായി ബന്ധപ്പെട്ട് ഒരുവിഭാഗം ടാക്സി ഡ്രൈവർമാർക്ക് പരാതി. തീരുമാനത്തിൽ പ്രതിഷേധിച്ച് നഗരസഭ ട്രാഫിക് റഗുലേറ്ററി കമ്മിറ്റി യോഗത്തിൽനിന്ന് ഇവർ ഇറങ്ങിപ്പോയി. അതേസമയം, മുൻ നിശ്ചയിച്ച പ്രകാരമുള്ള പരിഷ്കാരം വ്യാഴാഴ്ച മുതൽ നടപ്പിൽ വരുത്താൻ യോഗം തീരുമാനിച്ചു. കൂത്തുപറമ്പ് റോഡിൽ പാർക്ക് ചെയ്യുന്ന ടാക്സികൾ പഴയ കെ.എസ്.ഇ.ബി ഓഫിസിന് സമീപത്തേക്ക് മാറ്റാനായിരുന്നു റഗുലേറ്ററി അതോറിറ്റിയുടെ നേരത്തെയുള്ള തീരുമാനം. ഡ്രൈവർമാരുടെ എതിർപ്പിനെ തുടർന്ന് ഇത് നടപ്പിലാക്കിയിരുന്നില്ല. ഇൗ സാഹചര്യത്തിലാണ് ഇന്നലെ ചേർന്ന യോഗത്തിൽ ഇക്കാര്യം വീണ്ടും ചർച്ചയായത്. എന്നാൽ, മറ്റാവശ്യങ്ങൾക്ക് നൽകാൻ കഴിയില്ല എന്ന് ജലസേചന വകുപ്പ് അറിയിച്ച സ്ഥലേത്തക്ക് ടാക്സി സ്റ്റാൻഡ് മാറ്റണമെന്ന ചെയർപേഴ്സ​െൻറ പിടിവാശി കാരണമാണ് യോഗത്തിൽനിന്ന് ഇറങ്ങിപ്പോയതെന്ന് ടാക്സി ഡ്രൈവർമാർ പറഞ്ഞു. നിയമലംഘനം നടത്തി നിലവിലെ സ്റ്റാൻഡ് മാറാൻ തയാറല്ലെന്ന് ഡ്രൈവർമാരുടെ പ്രതിനിധി പി. രാജൻ അറിയിച്ചു. അതേസമയം, വകുപ്പുകൾ തമ്മിലുള്ള കാര്യങ്ങൾ നഗരസഭ കൈകാര്യം ചെയ്യുമെന്നും വ്യാഴാഴ്ച മുതൽ റഗുലേറ്ററി അതോറിറ്റി യോഗ തീരുമാനപ്രകാരം ടാക്സി സ്റ്റാൻഡ് മാറ്റുന്നതുൾപ്പെടെയുള്ള പരിഷ്കാരങ്ങൾ തുടരുമെന്നും നഗരസഭ ചെയർപേഴ്സൻ കെ.വി. റംല അറിയിച്ചു. യോഗത്തിൽ പാനൂർ സി.ഐ വി.വി. ബെന്നി, െഡപ്യൂട്ടി തഹസിൽദാർ, ജോയൻറ് ആർ.ടി.ഒ, വിവിധ സംഘടന പ്രതിനിധികൾ എന്നിവർ പങ്കെടുത്തു.