ഉന്നതതല അന്വേഷണം നടത്തണം

തലശ്ശേരി: പിണറായി കൂട്ടക്കൊലക്കേസും പ്രതി സൗമ്യയുടെ ദുരൂഹ സാഹചര്യത്തിലുള്ള ജയിലിലെ മരണവും സംബന്ധിച്ച് ഉന്നതതല അന്വേഷണം വേണമെന്ന് കെ.പി.സി.സി ജനറല്‍ സെക്രട്ടറി വി.എ. നാരായണൻ ആവശ്യപ്പെട്ടു. സംഭവം സംബന്ധിച്ച് ബന്ധുക്കളും നാട്ടുകാരും സംശയം പ്രകടിപ്പിച്ച് മുന്നോട്ടുവന്നിട്ടുണ്ട്. പൊലീസ് കേസന്വേഷണം നടത്തിയത് ലാഘവ ബുദ്ധിയോടുകൂടിയും ആരെയോ സംരക്ഷിക്കണമെന്ന വ്യഗ്രതയോടെയുമാണ്. സൗമ്യക്ക് വന്ന ഫോണ്‍കാളുകളെക്കുറിച്ച് ശാസ്ത്രീയമായി അന്വേഷിക്കാനോ ബന്ധപ്പെട്ട പ്രതികളെ ശാസ്ത്രീയ രീതിയിൽ ചോദ്യം ചെയ്യാനോ പൊലീസ് തയാറായിട്ടില്ല. ഉത്തരേന്ത്യയിൽ മാത്രം കേട്ടുകേൾവിയുള്ള രീതിയിലാണ് വനിത ജയിലിൽ പ്രതി ആത്മഹത്യ ചെയ്യുന്നത്. ഇതേക്കുറിച്ച് അന്വേഷിച്ച ജയിൽ ഡി.ഐ.ജിയുടെ റിപ്പോര്‍ട്ട് തികച്ചും പരിഹാസ്യമാണ്. സംശയം ദൂരീകരിക്കാൻ ലോക്കൽ പൊലീസിനെ മാറ്റിനിർത്തി ഉന്നതതല അന്വേഷണം വേണമെന്ന് വി.എ. നാരായണന്‍ ആവശ്യപ്പെട്ടു.