കൊട്ടിയൂർ പുനർനിർമിക്കാൻ സഹായ അഭ്യർഥനയുമായി കമ്മിറ്റി

കേളകം: മഴക്കെടുതി തകർത്ത കൊട്ടിയൂരിനെ സഹായിക്കാൻ അഭ്യർഥനയുമായി കൊട്ടിയൂർ പുനർനിർമാണ കമ്മിറ്റി. കൊട്ടിയൂരിൽ കഴിഞ്ഞമാസം കാലവർഷക്കെടുതിയിൽ കോടികളുടെ നഷ്ടമാണുണ്ടായത്. ഇത് പരിഹരിക്കുന്നതിന് സർക്കാർ സഹായം പര്യാപ്തമാകിെല്ലന്ന കണ്ടെത്തലാണ് പൊതുജനങ്ങളിൽനിന്ന് സഹായം അഭ്യർഥിക്കാൻ കൊട്ടിയൂർ പുനർനിർമാണ കമ്മിറ്റിയെ പ്രേരിപ്പിച്ചതെന്ന് ഭാരവാഹികൾ പറഞ്ഞു. സണ്ണി ജോസഫ് എം.എൽ.എ, പി.കെ. ശ്രീമതി എം.പി എന്നിവരുടെ സാന്നിധ്യത്തിൽ ചേർന്ന യോഗത്തിൽ പഞ്ചായത്ത് പ്രസിഡൻറ് ഇന്ദിര ശ്രീധരൻ ചെയർമാനും പി. തങ്കപ്പൻ കൺവീനറും വൈസ് പ്രസിഡൻറ് റോയി നമ്പുടാകം ട്രഷററായും കൊട്ടിയൂർ പുനർനിർമാണ കമ്മിറ്റി രൂപവത്കരിച്ചു. കമ്മിറ്റിയുടെ പേരിൽ സൗത്ത് ഇന്ത്യൻ ബാങ്കി​െൻറ കൊട്ടിയൂർ ശാഖയിൽ അക്കൗണ്ട് തുടങ്ങുകയും ചെയ്തിട്ടുണ്ട്. കൊട്ടിയൂരിൽ ആഗസ്റ്റ് എട്ടു മുതലുണ്ടായ ഉരുൾപൊട്ടലിലും മണ്ണിടിച്ചിലിലും മലവെള്ളപ്പാച്ചിലിലും 14 വീടുകൾ പൂർണമായും 163 വീടുകൾ ഭാഗികമായും തകർന്നു. പുഴ ഗതിമാറി ഒഴുകിയും മലവെള്ളപ്പാച്ചിൽമൂലവും 10 ഹെക്ടർ കൃഷി നശിക്കുകയും 15 ഹെക്ടർ സ്ഥലം നഷ്ടപ്പെടുകയും ചെയ്തു. പഞ്ചായത്തിലെ 16 റോഡുകളും മൂന്ന് പാലങ്ങളും തകർന്നു. മൂന്ന് ജലസേചന കനാലുകൾ, നിരവധി റോഡുകളുടെ പാർശ്വഭിത്തികൾ, കലുങ്കുകൾ എന്നിവ പൂർണമായി തകർന്നു. ഇത് പുനർനിർമിക്കുന്നതിന് ഏകദേശം 10 കോടി രൂപ ആവശ്യമാണ്. ഏകദേശം 10 ലക്ഷത്തോളം രൂപയുടെ കൃഷിനാശവും ഉണ്ടായി. ഉരുൾപൊട്ടലും ഭൂമി വിണ്ടുകീറലും ഉണ്ടായ പ്രദേശത്തെ ജനങ്ങളെ മാറ്റിപാർപ്പിക്കുന്നതിന് ആറ് സ്കൂളുകളിൽ ദുരിതാശ്വാസ ക്യാമ്പുകൾ തുറന്നിരുന്നു. വിവിധ ഔദ്യോഗിക അനൗദ്യാഗിക ക്യാമ്പുകളിലായി 40 കുടുംബങ്ങളിലുള്ള 274 ആളുകളെ സുരക്ഷിതമായി എല്ലാവിധ അടിസ്ഥാന സൗകര്യങ്ങളും ഭക്ഷണവും നൽകി പുനരധിവസിപ്പിച്ച് സംരക്ഷിച്ചു വരുന്നു. അതിനായി പഞ്ചായത്ത്, റവന്യൂ വകുപ്പിലെ ഉദ്യോഗസ്ഥർ, വിവിധ രാഷ്ട്രീയ പാർട്ടി പ്രവർത്തകർ, വിവിധ വകുപ്പ് മന്ത്രിമാർ, എം.എൽ.എ, എ.പിമാർ, കലക്ടർ, വിവിധ സാമുദായിക സാമൂഹിക സംഘടന പ്രവർത്തകർ, സന്നദ്ധ സംഘടന പ്രവർത്തകർ, വിവിധ മത മേലധ്യക്ഷൻമാർ എന്നിവർ നൽകിയ സഹായവും പിന്തുണയും വിലമതിക്കാനാവാത്തതാണെന്ന് കമ്മിറ്റി പറഞ്ഞു. ഗ്രാമപഞ്ചായത്തിനെ ഈ ദുരന്തത്തെ നേരിടുന്നതിന് സഹായിച്ച എല്ലാവർക്കും കമ്മിറ്റി നന്ദി അറിയിച്ചു. സഹായങ്ങൾ അയക്കേണ്ട അക്കൗണ്ട് വിവരങ്ങൾ: സൗത്ത് ഇന്ത്യൻ ബാങ്ക്, കൊട്ടിയൂർ ശാഖ, അക്കൗണ്ട് നമ്പർ: 0970173000000013, ഐ.എഫ്.എസ്.സി SIBL 0000971. വാർത്തസമ്മേളനത്തിൽ പഞ്ചായത്ത് പ്രസിഡൻറ് ഇന്ദിര ശ്രീധരൻ, വൈസ് പ്രസിഡൻറ് റോയി നമ്പുടാകം, തങ്കപ്പൻ, പി.എ. ദേവസ്യ, പി.സി. രാമകൃഷ്ണൻ, പി.എസ്. മോഹനൻ, ജോസ് കാഞ്ഞിരംപാറ, ബേബി ഇടക്കുഴി, ജോർജ് തടത്തിൽ എന്നിവർ പങ്കെടുത്തു.