എസ്.എഫ്.ഐ ജില്ല സമ്മേളനം നാളെ പയ്യന്നൂരിൽ തുടങ്ങും

പയ്യന്നൂർ: എസ്.എഫ്.ഐ ജില്ല സമ്മേളനം ബുധനാഴ്ച പയ്യന്നൂരിൽ തുടങ്ങും. വൈകീട്ട് മൂന്നിന് പെരുമ്പ കേന്ദ്രീകരിച്ച് വിദ്യാർഥി പ്രകടനത്തിനുശേഷം ഷേണായി സ്ക്വയറിലെ ആസിഫ ബാനു നഗറിൽ നടക്കുന്ന പൊതുസമ്മേളനം ഡി.വൈ.എഫ്.ഐ കേന്ദ്ര കമ്മിറ്റി അംഗം എ.എ. റഹീം ഉദ്ഘാടനം ചെയ്യും. 10ന് രാവിലെ 10ന് അയോധ്യ ഓഡിറ്റോറിയത്തിൽ പ്രതിനിധി സമ്മേളനം സി.പി.എം കേന്ദ്ര കമ്മിറ്റി അംഗം ഇ.പി. ജയരാജൻ എം.എൽ.എ ഉദ്ഘാടനം ചെയ്യും. വൈകീട്ട് അഞ്ചിന് ഷേണായി സ്ക്വയറിൽ സാംസ്കാരിക സമ്മേളനത്തിൽ ഡോ. പി.ജെ. വിൻസ​െൻറ് മുഖ്യപ്രഭാഷണം നടത്തും. തുടർന്ന് ദൃശ്യ പയ്യന്നൂർ അവതരിപ്പിക്കുന്ന വനിതകളുടെ നാടകവും കോൽക്കളിയും അരങ്ങേറും. 18 ഏരിയകളിൽ നിന്നായി 391 പ്രതിനിധികൾ പങ്കെടുക്കും. പുതിയ ജില്ല കമ്മിറ്റിയുടെയും ഭാരവാഹികളുടെയും തെരഞ്ഞെടുപ്പോടെ 11ന് വൈകീട്ട് സമ്മേളനം സമാപിക്കും. സമ്മേളനത്തിന് അനുബന്ധമായി സാംസ്കാരിക സമ്മേളനങ്ങൾ, ചിത്രരചന മത്സരം, കലാകായിക മത്സരങ്ങൾ തുടങ്ങിയവ നടത്തിയെന്ന് ടി.ഐ. മധുസൂദനൻ, കെ.പി. മധു, ടി. വിശ്വനാഥൻ, കെ.യു. രാധാകൃഷ്ണൻ, പി. അഖിൽ, മുഹമ്മദ് സിറാജ്, ടി.വി.എം. ഷീമ, കെ. മനുരാജ് എന്നിവർ അറിയിച്ചു.