മുഴപ്പിലങ്ങാട് ധർമക്കുളം നവീകരണപ്രവർത്തനം പുനരാരംഭിച്ചു

മുഴപ്പിലങ്ങാട്: കാലപ്പഴക്കംകാരണം ശോച്യാവസ്ഥയിലായ മുഴപ്പിലങ്ങാട് കുളംബസാറിലെ ധർമക്കുളം നവീകരണപ്രവർത്തനം പുനരാരംഭിച്ചു. കുളത്തിന് സമീപം താമസിക്കുന്ന കെ.കെ. ഹൗസിലെ സുകുമാരൻ എന്നയാളുടെ പരാതിയിൽ മുമ്പ് നവീകരണപ്രവൃത്തി തടഞ്ഞിരുന്നു. എന്നാൽ, പരാതിക്ക് അടിസ്ഥാനമില്ലെന്ന് വ്യക്തമാക്കി നവീകരണജോലി പുനരാരംഭിക്കാൻ പഞ്ചായത്ത് മുൻകൈ എടുക്കുകയായിരുന്നു. കുളത്തി​െൻറ പഴകിയ കല്ലുകൾ അടർത്തി അടിഭാഗത്തെ ചളിയും വെള്ളവും വറ്റിച്ചശേഷം കോൺക്രീറ്റ് ബെൽറ്റിൽ നെല്ലിപ്പട നിർമിച്ചാണ് അടിത്തറ ശരിയാക്കുന്നത്. നടാൽ ഊർപഴശ്ശി ദേവസ്വം ബോർഡി​െൻറ ഉടമസ്ഥതയിൽ 100 വർഷങ്ങൾക്ക് മുമ്പ് പണികഴിപ്പിച്ചതാണ് കുളംബസാറിലെ ധർമക്കുളം.