ദുഃഖസാഗരത്തിൽ ഏകനായ ജിത്തുവിന്​ വീടൊരുങ്ങും

പയ്യന്നൂർ: രാമന്തളിയെയും പരിസര പ്രദേശങ്ങളെയും ഒന്നടങ്കം ദുഃഖത്തിലാഴ്ത്തി 2016ൽ കുന്നരു കാരന്താട്ടുണ്ടായ വാഹനാപകടത്തിൽ മാതാപിതാക്കളും സഹോദരിയും നഷ്ടപ്പെട്ട ജിത്തുവിന് വീടൊരുങ്ങുന്നു. അന്ന് അപകടത്തിൽ അഞ്ചുപേരാണ് മരിച്ചത്. ദുരന്തത്തിൽ വടക്കുമ്പാട് തുരുത്തുമ്മൽ കോളനിയിലെ ഗണേശൻ-ലളിത ദമ്പതിമാരും മകളും മരിച്ചു. അവശേഷിച്ച ഇവരുടെ ഏക മകൻ ജിത്തുവിന് വീടെന്ന നാട്ടുകാരുടെ ആഗ്രഹമാണ് യാഥാർഥ്യമാവുന്നത്. നാട്ടിലെ സാമൂഹിക-ജീവകാരുണ്യ പ്രവർത്തകനായ കെ.പി. ബാലകൃഷ്ണ​െൻറ ശ്രമഫലമായി ഏഴിമല ലയൺസ് ക്ലബ് സൗജന്യമായി നൽകിയ സ്ഥലത്ത് വീടിന് കുറ്റിയടിച്ചു. ചടങ്ങിൽ 'ജിത്തു ഭവന നിർമാണ കമ്മിറ്റി' ചെയർപേഴ്സൻ കെ. സജിനി അധ്യക്ഷത വഹിച്ചു. ഒ.കെ. ശശി, വില്ലേജ് ഓഫിസർ പി. സുധീർകുമാർ, കെ.പി. ബാലകൃഷ്ണൻ, പുഞ്ചക്കാട് സ​െൻറ് മേരീസ് യു.പി സ്കൂൾ പ്രധാനാധ്യാപിക സിസ്റ്റർ അനീഷ, വാർഡ് മെംബർമാരായ കെ. കൃഷ്ണൻ, സി. ജയരാജൻ, ഭവന നിർമാണ കമ്മിറ്റി കൺവീനർ കെ. വിജയൻ, പി.എം. ലത്തീഫ്, കക്കുളത്ത് അബ്ദുൽ ഖാദർ, പി.കെ. ഷബീർ, എൻ.എസ്.എസ് സെക്രട്ടറി അജിത്, സ​െൻറ് മേരീസ് സ്‌കൂൾ പി.ടി.എ പ്രസിഡൻറ് എൻ.വി. മോഹനൻ, സി. ചന്ദ്രൻ തുടങ്ങിയവർ സംസാരിച്ചു. സ​െൻറ് മേരീസ് വിദ്യാലയ അധ്യാപകർ, ജീവനക്കാർ, പൂർവ വിദ്യാർഥികൾ, രക്ഷിതാക്കൾ തുടങ്ങിയവർ സ്വരൂപിച്ച സംഖ്യ ജിത്തുവിന് പ്രധാനാധ്യാപിക കൈമാറി.