ദലിതുകൾ ബുദ്ധമതം സ്വീകരിച്ചു

മംഗളൂരു: ദക്ഷിണ കന്നട ജില്ലയിൽ പുത്തൂരിനടുത്ത അലങ്കാറു ഗ്രാമത്തിൽ സ്ത്രീകൾ ഉൾപ്പെടെ ദലിത് വിഭാഗത്തിലെ 11 പേർ ബുദ്ധമതം സ്വീകരിച്ചു. തങ്ങൾ നിലകൊള്ളുന്ന മതത്തിൽനിന്ന് താഴ്ന്നജാതിക്കാരെന്നനിലയിൽ അനുഭവിക്കുന്ന പ്രയാസങ്ങളാണ് പുതിയ മതപ്രവേശനത്തിന് പ്രേരകമെന്ന് മതം മാറിയവർ പറഞ്ഞു. ദലിത് കുടുംബത്തി​െൻറ ഗൃഹപ്രവേശന വേളയിലാണ് പുട്ടണ്ണ, നയൻകുമാർ, സതീഷ് കുമാർ, വിശ്വനാഥ്, മനോജ് കുമാർ, ഗണേശ്, സുശീല, നമിത, പ്രേമ, ഹർഷ, സുശീല എന്നിവർ ബുദ്ധമതം സ്വീകരിച്ചത്. ബുദ്ധപ്രതിമക്ക് കീഴെ ഡോ. ബി.ആർ. അംബേദ്കറുടെ ഛായാപടം വെച്ച് പ്രാർഥനയും അംബേദ്കറി​െൻറ ആശയങ്ങൾ പ്രാവർത്തികമാക്കാനുള്ള പ്രതിജ്ഞയും ചൊല്ലി. ബുദ്ധമത മഹാസഭ നേതാവ് സുഗതപല ഭന്തേജി ബുദ്ധപൂജയോടെ ധർമോപദേശം നൽകി. ദലിത് സംഘർഷസമിതി പുത്തൂർ താലൂക്ക് ഓർഗനൈസിങ് കൺവീനർ അനന്ത മിതബയിൽ നേതൃത്വം നൽകി.