പാലക്കുന്ന്-ആറാട്ടുകടവ് റോഡ്​ തകർന്നു

ഉദുമ: പാലക്കുന്ന്-ആറാട്ടുകടവ് ഗ്രാമീണ റോഡ് തകർന്ന് തരിപ്പണമായി. റോഡ് അറ്റകുറ്റപ്പണി നടത്താത്തതിനാൽ നാട്ടുകാർ പ്രതിഷേധത്തിലാണ്. റോഡ് പുനർനിർമാണം ടെൻഡർ നടന്നു കഴിഞ്ഞുവെന്നും മഴക്കാലമായതിനാലാണ് ജോലി ആരംഭിക്കാത്തതെന്നുമാണ് പഞ്ചായത്ത് വാദം. മഴക്കുമുമ്പ് കുഴി നികത്താമെന്ന വാഗ്ദാനവും നടന്നില്ല. പാലക്കുന്ന് കിഴക്ക് ഭാഗത്ത് റെയിൽവേ ഗേറ്റിൽ തുടങ്ങി ആറാട്ടുകടവ് വഴി, നാഷനൽ ഹൈവേയിലേക്കും അതുവഴി പെരിയയിലെത്താനുമുള്ള ഏക റോഡാണിത്. ജനങ്ങൾ തിങ്ങിവസിക്കുന്ന കണിയമ്പാടി, വെടിത്തറക്കാൽ, എരോൾ ഭാഗങ്ങളിലേക്ക് വിദ്യാർഥികളടക്കമുള്ള നൂറുകണക്കിനാളുകളാണ് ദിവസവും ഇതുവഴി യാത്ര ചെയ്യുന്നത്. സ്വകാര്യ വാഹനങ്ങൾക്കുപുറമെ, നിരവധി സ്കൂൾ വാഹനങ്ങളും സ്വകാര്യ ബസുകളും കടന്നുപോകുന്ന ഈ റോഡ് മഴ ആരംഭിച്ചതോടെ ചളിക്കുളമായിരിക്കുകയാണ്.