കനത്ത മഴയില്‍ തോടുകള്‍ കവിഞ്ഞൊഴുകി

ചെറുപുഴ: രണ്ടു ദിവസമായി തുടരുന്ന കനത്ത മഴയില്‍ മലയോരത്തെ തോടുകളെല്ലാം കവിഞ്ഞൊഴുകുകയാണ്. കാര്യങ്കോട് പുഴയുടെ തീരത്തുള്‍പ്പെടെ മണ്ണിടിച്ചിലും രൂക്ഷമായി. പ്രാപ്പൊയില്‍ തോടി​െൻറ മുളപ്ര ഭാഗത്ത് കൾവര്‍ട്ടിനു മുകളിലൂടെ വെള്ളമൊഴുകിയതോടെ ഏറെനേരം ഗതാഗതം തടസ്സപ്പെട്ടു. രക്ഷിതാക്കള്‍ കൂടെയെത്തിയാണ് സ്‌കൂള്‍ കുട്ടികളെ റോഡ് മുറിച്ചുകടത്തിയത്. തുടര്‍ച്ചയായ മഴയില്‍ വെള്ളം കുത്തിയൊഴുകി ഗ്രാമീണ റോഡുകള്‍ പലതും തകര്‍ച്ചയെ നേരിടുകയാണ്. വൈദ്യുതി ലൈനുകളില്‍ മരങ്ങള്‍ പൊട്ടിവീഴുന്നത് മിക്കപ്പോഴും വൈദ്യുതി മുടക്കത്തിനും ഇടയാക്കുന്നുണ്ട്.