ഭൂമിക്കൊരു കവചം: തുടര്‍ പ്രവര്‍ത്തനങ്ങളുമായി വിദ്യാർഥികള്‍

പയ്യന്നൂർ: പ്രകൃതി സംരക്ഷണ പ്രവര്‍ത്തനത്തില്‍ മാതൃകയായി വിദ്യാർഥി കൂട്ടായ്മ. കണ്ടങ്കാളി ഷേണായി സ്മാരക ഗവ. ഹയര്‍ സെക്കൻഡറി എൻ.എസ്.എസ് യൂനിറ്റി​െൻറ നേതൃത്തിലാണ് 'ഭൂമിക്കൊരു കവചം' പരിപാടി നടന്നത്. പരിപാടിയുടെ ഉദ്ഘാടനം പയ്യന്നൂര്‍ നഗരസഭ ചെയര്‍മാന്‍ അഡ്വ. ശശി വട്ടക്കൊവ്വല്‍ നിര്‍വഹിച്ചു. പയ്യന്നൂരിലെ എല്ലാ സർക്കാർ ഓഫിസുകളിലും നട്ട ഫലവൃക്ഷങ്ങള്‍ സംരക്ഷിക്കാനുള്ള സംരക്ഷണ കവചം ചടങ്ങില്‍ സുന്ദരം ഫിനാന്‍സ് പയ്യന്നൂര്‍ ബ്രാഞ്ച് മാനേജര്‍ പി.വി. ദിപുവും നഗരസഭ ചെയര്‍മാനും സ്കൂളിന് കൈമാറി. പ്രിന്‍സിപ്പല്‍ ടി.പി. സക്കറിയ അധ്യക്ഷത വഹിച്ചു. വി.വി. ബിജു, ടി.പി. അശോകന്‍ എന്നിവര്‍ സംസാരിച്ചു. കൃഷി വകുപ്പുമായി ചേര്‍ന്ന് മുഴുവന്‍ വിദ്യാഥികള്‍ക്കും 'മഴക്കാല ഓണത്തിനൊരു മുറം പച്ചക്കറി' കൃഷിയുടെ വിത്ത് കിറ്റ് ചെയര്‍മാന്‍ വിതരണം ചെയ്തു. പരിപാടിയുടെ ഭാഗമായി പയ്യന്നൂര്‍ താലൂക്ക് ആശുപത്രി, പൊലീസ് സ്റ്റേഷന്‍, താലൂക്ക് ഓഫിസ് പരിസരം, എ.ഇ.ഒ ഓഫിസ്, നഗരസഭ ഓഫിസ് പരിസരം, പയ്യന്നൂര്‍ പുതിയ ബസ്സ്റ്റാൻഡ് പരിസരം എന്നിവിടങ്ങളില്‍ വിദ്യാർഥികള്‍ വൃക്ഷത്തൈ നടുകയും സംരക്ഷണ കവചം സ്ഥാപിക്കുകയും ചെയ്തു.