തലശ്ശേരിയിൽ രണ്ടു സ്​റ്റീല്‍ ബോംബുകൾ​ കണ്ടെത്തി

തലശ്ശേരി: സി.പി.എം-ബി.ജെ.പി സംഘര്‍ഷം നിലനിൽക്കുന്ന തിരുവങ്ങാട് ഇല്ലത്തുതാഴെയില്‍ പൊലീസ് നടത്തിയ റെയ്ഡിൽ മാരകശേഷിയുള്ള രണ്ടു സ്റ്റീല്‍ ബോംബുകളും ബോംബ് നിര്‍മിക്കാനായി സൂക്ഷിച്ച സ്റ്റീല്‍ കണ്ടെയ്നറുകളും പിടികൂടി. വ്യാഴാഴ്ച രാവിലെ നടത്തിയ റെയ്ഡിലാണ് ഇവ കണ്ടെടുത്തത്. കഴിഞ്ഞദിവസം ഇവിടെയുള്ള പൊലീസ് പിക്കറ്റ് പോസ്റ്റിലെ പൊലീസുകാരനെ സി.പി.എം പ്രവര്‍ത്തകര്‍ ൈകയേറ്റം ചെയ്തിരുന്നു. ഈ സംഭവത്തില്‍ പ്രതിയായ ഒരു സി.പി.എം പ്രവര്‍ത്തകൻ അറസ്റ്റിലാവുകയും ചെയ്തു. ഇതി​െൻറ പശ്ചാത്തലത്തിലാണ് തലശ്ശേരി കൺട്രോള്‍ റൂം എസ്.ഐ ജയശങ്കറി​െൻറ നേതൃത്വത്തില്‍ റെയ്ഡ് നടത്തിയത്. കണ്ണൂരില്‍നിന്നെത്തിയ ബോംബ് സ്ക്വാഡും ഡോഗ് സ്‌ക്വാഡും ഒപ്പമുണ്ടായിരുന്നു. ആള്‍താമസമില്ലാത്ത ക്വാര്‍േട്ടഴ്‌സി​െൻറ പിറകിലെ കാടുപിടിച്ചസ്ഥലത്താണ് പ്ലാസ്റ്റിക് കവറില്‍ സൂക്ഷിച്ചനിലയിൽ ബോംബുകള്‍ കണ്ടെത്തിയത്. പിടിച്ചെടുത്ത ബോംബുകള്‍ പിന്നീട് നിര്‍വീര്യമാക്കി. സംഭവത്തില്‍ തലശ്ശേരി പൊലീസ് കേസെടുത്തു. ഇരുവിഭാഗത്തി​െൻറയും കൊടിതോരണങ്ങളും ബോര്‍ഡുകളും നശിപ്പിച്ചതിനെ തുടർന്ന് ഏതാനും ദിവസങ്ങളായി ഇല്ലത്തുതാഴെ മേഖലയില്‍ സി.പി.എം-ബി.ജെ.പി സംഘര്‍ഷം നിലനിൽക്കുകയായിരുന്നു.