അധ്യാപികയെ അപമാനിക്കാൻ ശ്രമം: പൊലീസ്​ നടപടി സ്വീകരിക്കുന്നില്ലെന്ന്​

കണ്ണൂർ: ലൈബ്രറി അധ്യാപികയെ അപമാനിച്ച കേസിൽ നടപടിയെടുക്കാൻ പൊലീസ് മടിക്കുന്നുവെന്ന്് ആക്ഷേപം. കണ്ണൂർ ചിന്മയ മിഷൻ സ്കൂളിലെ അധ്യാപികയെയാണ് ചിന്മയ മിഷൻ സെക്രട്ടറി കെ.കെ. രാജൻ അപമാനിച്ചത്. അധ്യാപികയുടെ പരാതിയെ തുടർന്ന് ജാമ്യമില്ലാ വകുപ്പ് പ്രകാരം പൊലീസ് കേസെടുത്തിട്ടുണ്ടെങ്കിലും ഇതുവരെ നടപടിക്ക് മുതിർന്നിട്ടില്ല. കഴിഞ്ഞ വെള്ളിയാഴ്ചയാണ് അധ്യാപികയെ സെക്രട്ടറി അസഭ്യം പറയുകയും ഭീഷണിപ്പെടുത്തുകയും ചെയ്തത്. അധ്യാപികയുമായി ബന്ധപ്പെട്ട് സ്കൂളിൽ തൊഴിൽതർക്കം നിലനിൽക്കുന്നുണ്ട്. ഇതുസംബന്ധിച്ചുള്ള വൈരാഗ്യമാണ് സംഭവത്തിന് കാരണമെന്ന് അധ്യാപിക ടൗൺ പൊലീസ് സ്റ്റേഷനിൽ നൽകിയ പരാതിയിൽ പറഞ്ഞിരുന്നു. ഇൗ സംഭവത്തിനുശേഷം അധ്യാപികയെ പിരിച്ചുവിടുകയും ചെയ്തിരുന്നു. പൊലീസ് നടപടിയെടുത്തില്ലെങ്കിൽ സമരപരിപാടികളുമായി മുന്നോട്ടുപോകുമെന്നും കേരള അൺ എയ്ഡഡ് ടീച്ചേഴ്സ് ആൻഡ് സ്റ്റാഫ് യൂനിയൻ ജില്ല പ്രസിഡൻറ് കെ.വി. സുമേഷും സെക്രട്ടറി ടി. വേണുവും അറിയിച്ചു.