റെയിൽവേ ജീവനക്കാര​െൻറ സാഹസികത; മരണം മുന്നിൽ കണ്ട മധ്യവയസ്​കന്​ രണ്ടാം ജന്മം

റെയിൽവേ ജീവനക്കാര​െൻറ സാഹസികത; മരണം മുന്നിൽ കണ്ട മധ്യവയസ്കന് രണ്ടാം ജന്മം ആലുവ: ട്രാക്ക് മുറിച്ച് കടക്കാന്‍ ശ്രമിക്കവേ ട്രെയിനിന് മുന്നില്‍ അകപ്പെട്ട മധ്യവയസ്കനെ അദ്ഭുതകരമായി രക്ഷപ്പെടുത്തി. ശനിയാഴ്ച വൈകീട്ട് അഞ്ച് മണിയോടെ ആലുവ റെയില്‍വേ സ്റ്റേഷനിലെ ഒന്നാം നമ്പര്‍ പ്ലാറ്റ്ഫോമിലാണ് സംഭവം. റെയില്‍വേ പാഴ്സല്‍ ഉദ്യോഗസ്ഥന്‍ ഷാനവാസാണ് ജീവന്‍ പോലും പണയം വെച്ച് യാത്രക്കാരനെ രക്ഷപ്പെടുത്തിയത്. ഏപ്രില്‍ ആദ്യവാരം സമാന രീതിയില്‍ പൊലീസ് ഉദ്യോഗസ്ഥന്‍ യാത്രക്കാര​െൻറ ജീവന്‍ രക്ഷിച്ചിരുന്നു. ഒന്നാംനമ്പര്‍ പ്ലാറ്റ്ഫോമില്‍നിന്ന് റെയിവേ ട്രാക്ക് മുറിച്ചുകടന്ന് മൂന്നാം നമ്പര്‍ പ്ലാറ്റ്േഫാമില്‍ കിടന്ന ട്രെയിനില്‍ കയറാന്‍ ശ്രമിക്കുകയായിരുന്ന 45 വയസ്സ് പ്രായം തോന്നിക്കുന്നയാളെയാണ് കഴിഞ്ഞദിവസം രക്ഷപ്പെടുത്തിയത്. ഒന്നാം നമ്പര്‍ ട്രാക്കില്‍ നില്‍ക്കുമ്പോള്‍ തൊട്ടുപിന്നില്‍ അതേ ട്രാക്കില്‍ പട്ന എറണാകുളം ട്രെയിൻ പാഞ്ഞുവന്നത് ഇയാൾ അറിഞ്ഞില്ല. യാത്രക്കാര്‍ ഒച്ചവെെച്ചങ്കിലും ട്രെയിന്‍ ശ്രദ്ധിക്കാതെ ട്രാക്കില്‍ തന്നെ നില്‍ക്കുകയായിരുന്നു. ഇതുകണ്ട ഷാനവാസ് ഇയാളുടെ ഇരുതോളിലും കൈകള്‍ കോര്‍ത്ത് പ്ലാറ്റ്ഫോമിലേക്ക് ഉയര്‍ത്തി രക്ഷപ്പെടുത്തുകയായിരുന്നു. സെക്കൻഡുകളുടെ വ്യത്യാസത്തില്‍ ട്രെയിന്‍ കടന്നുപോയി. ആളുകള്‍ ഓടിക്കൂടിയപ്പോഴേക്കും ത​െൻറ പേര് ബാബു എന്ന് മാത്രം പറഞ്ഞ് ഇയാൾ നടന്നുപോയി. റെയിൽവേ പാഴ്സല്‍ ചീഫ് കോമേഴ്സല്‍ ഓഫിസറാണ് കൊടുങ്ങല്ലൂര്‍ കോട്ടപ്പുറം സ്വദേശി ഷാനവാസ്. റെയിൽവേ വോളിബാള്‍ ടീമിലെ ദേശീയ താരമായിരുന്ന ഷാനവാസ് എസ്.ആര്‍.എം.യു. നേതാവ് കൂടിയാണ്. ഇദ്ദേഹത്തെ റെയില്‍വേ അധികൃതര്‍ അനുമോദിച്ചു.